Səfurə Əlizadə Osloda “Pulun var?” dedi

Azərbaycanı “Eurovision-2010” mahnı müsabiqəsində təmsil edən Səfurə Əlizadə Avropa mediası qarşısında Üzeyir Hacıbəylinin “Arşın mal alan” operettasından fraqment ifa edib.

APA-nın Norveçə ezam olunmuş müxbirinin məlumatına görə, ikinci məşqdən sonra keçirilən mətbuat konfransı zamanı media mənsubları Səfurə Əlizadədən bir mahnı oxumasını istəyiblər. Azərbaycan təmsilçisi isə seçimi özü edərək dünya səviyyəli mərhum bəstəkarımız Üzeyir Hacıbəylinin bir musiqisini ifa edəcəyini deyib. O, 4 əcnəbi bek-vokalı ilə ayağa qalxaraq “Arşın mal alan” operettasından Telli ilə Vəlinin hissəsini (“Pulun var?”) ifa edib. Səfurə, onun rəqqası və bek-vokalçılar bu parçanın ifası zamanı milli Azərbaycan rəqsini də çoxsaylı media mənsublarına tanıdıblar.

Xatırladaq ki, Norveçin paytaxtı Osloda keçirilən 55-ci “Eurovision” müsabiqəsində Azərbaycanı təmsil edən Səfurə Əlizadə mayın 27-də II yarımfinalda 7-ci sırada çıxış edəcək. Həmin gün yarımfinalda çıxış edəcək 17 ölkə arasından 10-u səsvermə nəticəsində mayın 29-da keçiriləcək finalda iştirak hüququ qazanacaq.