Azərbaycanlı stilistdən maraqlı saç düzümü kolleksiyası –

Bakıda vizaj ustalarının müsabiqəsində münsiflər kürsüsündə iştirakçıları qiymətləndirən tanınmış stilist Anar Ağakişiyev müsabiqə üçün xüsusi kolleksiya hazırlayıb. Lent.az-ın məlumatına görə, Anarın TAC adını verdiyi kolleksiyası maraqla qarşılanıb.

Təbii saçlardan hazırladığı baş karkaslarının fərqli makiyajla tandemini yaradan Anarın kolleksiyası hamının diqqətini çəkib. Şou boyu ekstravaqant saç düzümlərində olan modellər, modelyer Leyla Əhmədovanın kolleksiyasında yer alan geyimlərdə podiuma çıxıb. Qlobus formasında olub üzəri xüsusi led işıqlarla bəzədilmiş saç düzümü isə stilistin ən maraqlı işlərindən sayıla bilər. Belə ki saç düzümünün üzərində işıqlardan Azərbaycanın xəritəsi əks olunub. Bir aya yaxın bu kolleksiya üzərində çalışan Anar yaxınlarda daha bir səs-küylü layihəsini təqdim etməyə hazırlaşır. Bununla yanaşı Şəkinin regional televiziyası “Kanal S”də “Dəbin hökmü” proqramını aparan stilist yeniliklərini sözügedən proqramda da təqdim etməyi düşünür.