Ayaqqabı seçərkən nələrə diqqət edək?- 7 qızıl qayda

Qadınlar ayaqqabıya lazımlı əşya olaraq deyil, üslubumuzu tamamlayan bir aksessuar kimi baxmağı üstün tutur. Ayaqqabı seçərkən onun rahatlığından daha çox görünüşünə və geyim tərzinə uyğun olduğuna diqqət edir. Amma diqqət etməli başqa məqamlar da var. Belə ki, həkimlər bildirir ki, ayaqqabı seçimində səhvə yol vermək sağlamlığınıza mənfi təsir edə bilər. Bəs, ayaqqabı alarkən nələrə diqqət etmək lazımdır? İş və şəxsi həyatınızda fərdi imicinizin bir parçası olan ayaqqabılarınızı necə seçməlisiniz?

Lent.az xarici KİV-ə istinadən ayaqqabı seçərkən diqqət etməsi vacib olan 7 qaydanı təqdim edir:

1. Demək olar ki, hamımız eyni şeyi istəyirik, daha incə, daha dəbli və daha yaraşıqlı görünmək. Bunun üçün düz bir xətt təsiri yaratmaq lazımdır. Yalnız geyimlərdə deyil, ayaqqabılarda da buna fikir verməlisiniz. Ayaqqabılarınızla şalvarınızı və corablarınızı eyni tonlarda seçərək yuxarıdan aşağı bir bütünlük təşkil edə bilərsiniz. Eyni qaydanı ətəklərinizdə də tətbiq etməyi unutmayın, kəsilməz bir bütün xətt yaradın. Topuqdan bağlanan ayaqqabıların ən çox incə topuqlu xanımlara yaraşdığını bilirsiniz yəqin ki. İri topuqlu qadınlarımıza isə bu məsləhət deyildir, çünki belə ayaqqabılar sizin ayaqlarınızı daha da kobud göstər bilər.

2. İş həyatınızda 8 sm-dən hündür dabanlı ayaqqabılar heç məqsədə uyğun deyildir. İş geyimi mövzusunda ənənəvi sektorlar olan bank, maliyyə, hüquq, ictimai sektorlarda işləyən xanımlar klassik dikdabanlardan düzgün istifadə etməlidirlər. 4-5 sm-lik dikdabanlar əslində bir çox ayaqda gözəl görsənir. Baldırlarınızın kök olduğundan şikayət edirsinizsə, onu daha incə və uzun göstərmək üçün ən azından 2,5 -3 smlik dabanlar seçin, düz babet və idman ayaqqabılardan uzaq durun. Bunlar sizin ayaqlarınızı daha da kök göstərməyə səbəb ola bilər.

3. İşdə geyinəcəyiniz ayaqqabılara qərar verməkdə çətinlik çəkirsinizsə, burnu açıq ayaqqabılar, sandal, rəqs ayaqqabıları, başmaqlar ənənəvi iş yeri geyiminə heç də uyğun deyildir, bunu unutmayın. Burnu bağlı ya da yaz ayları üçün arxadan bantlı ayaqqabılar bu tərz geyim üçün ən uyğun seçimlərdəndir.

4. Ayaqqabınızın ayaqlarınızla, hətta baldırınızla mütənasib olmasına diqqət verməlisiniz. İti burunlu ayaqqabılar ayaqları daha uzun, yumru burunlularsa daha kiçik göstərir.

5. Ala biləcəyiniz ayaqqabının ən keyfiyyətlisini alın. Bir az daha bahalı gəlsə də, keyfiyyətli bir cüt ayaqqabı sizi daha uzun müddət “gəzdirəcək”. Unutmayın ki dost-düşmən hər kəs ayağa baxır.

6. Ayaqqabı alışını günortadan sonrakı saatlarda edin. Ayaq üstə dayanmaqla və ya gəzməklə yaranan yorğunluq ayaqlarınızda ən çox bu vaxtlar olur, ayaqqabı alışını bu saatlarda edin ki ayağınıza ən rahat olan doğru ayaqqabını seçmiş olasınız.

7. Ayaqqabı və çantalar eyni rəngdə olmaq məcburiyyətində deyil. Amma eyni stildə olmaları çox əhəmiyyətlidir. İdman ayaqqabılarla idman seqmentli çantaları, daha zərif fantaziya ayaqqabılarla eyni zəriflikdə çantaları uyğunlaşdırmağa diqqət etməlisiniz.