Xalası oğlundan hamilə qalan arvadına 10 bıçaq vurdu - "Beş aydır ayrılmışdıq"

Bakıda hamilə olan keçmiş arvadını qətlə yetirməyə cəhddə təqsirləndirilən Həbib Məmmədovun cinayət işi üzrə məhkəmə prosesi başa çatıb.

Lent.az həmin cinayət işi üzrə materialları əldə edib.

İttihama görə, H. Məmmədov bu il iyulun 1-də Sabunçu rayonu, Balaxanı qəsəbəsində sərxoş vəziyyətdə olarkən qısqanclıq zəminində keçmiş arvadı Lalə Məmmədovaya azyaşlı oğlunun gözü qarşısında 10-a yaxın bıçaq zərbələri vuraraq öldürməyə cəhd edib. Qadın ağır vəziyyətdə xəstəxanaya çatdırılıb, onun həyatını xilas etmək mümkün olub. Hüquq-mühafizə orqanlarının əməkdaşları tərəfindən H. Məmmədov saxlanılaraq istintaqa təhvil verilib. Araşdırma zamanı qadının hamilə olduğu məlum olub.

H. Məmmədov ittiham üzrə özünü təqsirli bilib və 2010-cu ildə Lalə Məmmədova ilə evləndiyi deyib: “Lalə ilə evliliyimizdən 2 övladımız olub. Özüm uzun müddət Nərimanov rayon Mənzil Kommunal Təsərrüfatı Birliyində fəhlə kimi işləmişəm. Hadisədən 5 ay əvvəl Lalə ilə qeyri-rəsmi ayrılmışıq. Lalə övladlarımla birlikdə qonşuluqda yaşayırdı, özüm isə yaxınlıqda yaşayan anamın yanına köçmüşdüm. Lalə tez-tez qonşumuz Nəcibənin evinə gedərək narkotik vasitələr qəbul edirdi və müxtəlif kişilərlə mənə xəyanət edirdi. O, düzgün yolda olmadığı üçün ayrılmışam”.

Təqsirləndirilən şəxs deyib ki, bu il iyunun 30-da axşam saat 22 radələrində evdə olduğu zaman qonşuda yaşayan Lalənin evindən yad kişi səsi eşidib:

“Bərk qəzəblənərək evin pəncərəsini döydüm. Amma nə qədər döysəm də, Lalə pəncərəni açmadı. Amma bir qədər sonra üstümə qışqırdı ki, “nə var gəlmisən bura, mən səni çağırmışam? Görmək istəmirəm səni”. Həmin an anladım ki, evdə yad kişi var və Lalə bu səbəbdən məni evə buraxmır. Lalənin bu hərəkətinə əsəbiləşib qərara gəldim ki, onu öldürüm. Evdəki çörək bıçağını götürüb həyətdəki hamamda gizlətdim. Səhəri gün işdən qayıtdıqdan sonra axşam saat 23 radələrində hamamda gizlətdiyim bıçağı götürüb Lalənin yaşadığı evin qapısını döydüm. Lalə qapını açdı və həyətə daxil oldum. Çöl darvazanı bağladım ki, hadisənin şahidi olmasın və evə heç kəs girə bilməsin. Bu zaman kiçik oğlum Abdulla həyətə çıxdı, mən isə ona evə girməsini söylədim. Abdulla evə girdikdən sonra mən bıçağı çıxaraq Lalənin bədəninə müxtəlif nahiyələrinə zərbələr endirdim. Lalə aldığı zərbələrdən yerə yıxıldı və bu zaman Abdulla yenidən həyətə çıxdı. Lalə yerə yıxıldıqdan sonra onun öldüyünü düşünüb evi tərk etdim. Sonra öz evimdə hamama keçərək əl-üzünü yuyub ordan çıxdım. Evdən çıxdıqdan sonra yaxınlığındakı qəbiristanlığa getdim. Orada olan zaman mülki geyimli polis əməkdaşları tərəfindən saxlanıldım”.

H. Məmmədov suallara cavab verən zaman qeyd edib ki, Lalənin hadisə zamanı hamilə olduğunu bilməmişəm:

“Lalənin hamilə olmasını tutulandan sonra xəbərim olub. Çünki Lalədən ayrıldığım 5-6 ay idi. Onun kimdənsə hamilə olmasını zənn etmirdim”.

Məhkəmədə zərərçəkmiş şəxs qismində ifadə verən L. Məmmədova deyib ki, ailə həyatı qurduqdan sonra qonşu və qohumların evlərinə xadimə olaraq gedib işləyib çörək pulu qazanıb ailəsini dolandırıb: “Həbiblə evimizin həyətində iki ev vardı. Birində biz, birində onun anasıgil qalırdı. Əvvəllər münasibətim yaxşı olsa da, ailə həyatı qurduqlarından bir müddət sonra Həbib spirtli içkiyə qurşandı. Mütəmadi olaraq spirtli içki qəbul edib evdə dava saldı, məni təhqir etdi. 2020-ci ilin əvvəllərində Həbibdən artıq ayrılmaq qərarına gəldim. Bundan sonra Həbib valideynlərinin yaşadığı evə köçdü, mən özüm isə övladlarımla evimizdə qaldıq. 2021-ci ilin aprel ayında rəsmi olaraq boşanmışıq. Boşanmağımıza baxmayaraq Həbib mütəmadi olaraq məni narahat edirdi. İçkili halda evə gələrək məni söyür, əxlaqsız təkliflər edirdi. Övladlarıma görə onu bağışlasam da, Həbiblə evlilik həyatını bərpa etmək istəmirdim”.

Zərərçəkən bildirib ki, hadisə günü evdə oğlu Abdulla və qonşusunun 10 yaşlı oğlu Ravil olub: “Gəcə saatlarında qapı döyüldü. Baxdım ki, Həbibdir. Həbib içəriyə girdikdən sonra çöl darvazanı bağladı, qapını bağladıqdan sonra “Noldu, nə fikirləşdin Lalə, barışmaq istəmirsən?” dedi. Mən isə Həbibə “Sən bir öz vid-fasonuna bax, sərxoş halda aşa-aşa gəlmisən evimə” cavab verdim. Bu zaman Həbib “100 manat verim, mənimlə bir yerdə olarsan?” deyərək, əxlaqsız təklif etdi. Mən də Həbibə “ayıb olsun, mən sənin üçün pozğun qadınam?” deyərək cavab verdim. Bu zaman həyətə oğlum Abdulla çıxdı və Həbib onu öpdükdən sonra evə girməyini dedi. Abdulla evə keçdikdən sonra Həbib evin qapısını örtdü, sonra sol əlini cibinə salaraq sağ əli ilə mənim boğazından tutub özünə tərəf fırlatdı. Qəflətən sol əlini cibindən çıxardaraq, bıçaqla qarın nahiyəmdən zərbələr vurdu. Mən özümü müdafiə etmək üçün Həbibi sol ayağım ilə itələdim. O, bunu görüb bıçaqla sol ayağıma bir neçə dəfə xəsarət yetirdi. Bu zaman səs-küyə evdən Abdulla çıxdı və aramıza girdi. Mən Abdullanı itələyərək qırağa çəkdim. Abdullanın çəkilməsini görən Həbib yenidən zərbələr endirməyə davam etdi. Həbib artıq vurduğu bıçaq xəsarətlərin məni öldürmək üçün yetəri olduğunu, artıq öldüyümü zənn edib çıxıb getdi. Bir təhər özümdə güc toplayıb anama zəng etdim. Bir müddət sonra təcili yardım gəldi və məni xəstəxanaya çatdırdı”.

L. Məmmədov suallara cavab verən zaman qeyd edib ki, Həbiblə 2020-ci ilin yanvar ayından ayrıldıqdan sonra xalası oğlu ilə münasibətdə olub və həmin münasibətdən hamilə qalıb.

Bakı Ağır Cinayətlər Məhkəməsinin hökmü ilə H. Məmmədov 14 il müddətinə azadlıqdan məhrum edilib.