Parlament Hesablama Palatasının hesabatını təsdiq etdi

Lent.az-ın məlumatına görə, o bildirib ki, Hesablama Palatası 2 il əvvəl 21, ötən il 31, bu il isə 41 yoxlama aparıb. Onun sözlərinə görə, hesabat dövründə yalnız yoxlamaların sayını yox, onların əhatə dairəsini genişləndirməyə çalışıblar.

Dövlət Neft Fondunda aparılan monitorinqlərə toxunan Əsədov bildirib ki, Azərbaycanın valyuta ehtiyatları çox etibarlı formada yerləşdirilir, onların yerləşdirilməsində və istifadə edilməsində heç bir təhlükə yoxdur.

“Bu gün Neft Fondunun 26.5 milyard dollar vəsaitinin 61 faizi vəsaiti AAA reytinqli fondlarda, 17 faizi isə AA reytinqli fondlarda saxlanılır. Düzdür, bunların gəlirliliyi azdır. Amma böhran şəraitində biz valyuta ehtiyatlarımızı müdafiə etməklə məşğul oluruq. Hesablama Palatasının aşkara çıxardığı nöqsanlar ənənəvidir. Bunlar əsasən satınalmalarla, mənzil-kommunal xidmətləri sahəsində normativlərin yerinə yetirilməməsi, təsərrüfat sahələrində insanların yol verdiyi nöqsanlarla və digər məsələlərlə bağlıdır” - deyə, Palata sədri bildirib.

H.Əsədov yoxlamalar zamanı aşkar edilən yeyintilərin qlobal miqyasda olmadığını deyib.

Milli Məclisin iqtisadi-siyasət komitəsinin sədri Ziyad Səmədzadə bildirib ki, Hesablama Palatası hesabat dövründə 60-a yaxın auditi əhatə edir. “Əvvəllər bu 20 idi, bunun 3 dəfə artması Palatanın işinin mükəmməl qurulması ilə bağlıdır” - deyə, komitə sədri məsələyə münasibət bildirib.

Müzakirələrdən sonra 97 nəfər lehinə, 3 nəfər əleyhinə və 1 millət vəkili də bitərəf olmaqla, hesabat təsdiq olunub.

Mübariz Aslanov