Taxıl istehsalı arta bilər

Bu il Azərbaycanda taxıl tədarükünün 2,5 milyon tona çatacağı gözlənilir. Bu gözləntinin özünü doğruldub-doğrultmayacağı aprel-may aylarında ölkə ərazisində hava şəraitindən asılı olacaq.

Kənd Təsərrüfatı Nazirliyindən Lent.az-az bildiriblər ki, ötən ilin yaz aylarında baş verən daşqınlarla əlaqədar taxıl istehsalı bir qədər aşağı düşmüşdü. Belə ki, 2010-cu ildə Azərbaycanda taxıl istehsalı 2 milyon tonadək azalmışdı. Bu il isə həyata keçirilən aqrotexniki tədbirlər taxıl istehsalının ötən illə müqayisədə təxminən 0,5 milyon ton artırmağa imkan verir. Taxılda mayalanma dövründə, yəni aprel-may yarım hava şəraiti əlverişli keçəcəyi təqdirdə bu gözləntilərin reallaşma ehtimalı yüksək olacaq.

Nazirlikdə bildirirlər ki, artıq regionlarda yaz-tarla işləri sürətlənib. Həmçinin təsərrüfatla məşğul olan qüvvələr, o cümlədən istehsalçılar taxıl zəmilərində aqrotexniki qulluğun göstərilməsinə səfərbər olunub. Məqsəd taxıl zəmilərində keyfiyyətli məhsul yetişdirməklə yanaşı məhsuldarlığı da artırmaqdır.

Elxan SALAHOV