Mərkəzi Bank treninq keçirir

Azərbaycan Respublikası Mərkəzi Bankının Tədqiqatlar və İnkişaf Mərkəzi (TİM) “Maliyyə sabitliyinin təhlili metodları və alətləri” mövzusunda treninq təşkil edib.

Mərkəzi Bankın mətbuat xidmətindən Lent.az-a bildiriblər ki, iki günlük treninq maliyyə sabitliyinin mahiyyəti və qiymətləndirilmə çərçivəsi, maliyyə sabitliyi monitorinqinin həyata keçirilməsi, kredit risklərinin ölçülməsi, maliyyə sabitliyi üzrə stress testlərin aparılmasına dair məsələlərə həsr olunub. Tədbirin məqsədi pul siyasətinin effektivliyinin artırılması və maliyyə sabitliyinin təmini istiqamətində tədqiqat potensialının gücləndirilməsidir. Treninq nəticəsində əldə olunacaq biliklərin Azərbaycan Mərkəzi Bankının müvafiq analitik-tədqiqat potensialının təkmilləşdirilməsinə xidmət edəcəyi gözlənilir.

Treninq Polşa Milli Bankının maliyyə sistemi üzrə müşaviri Pavel Viczanski və Maliyyə Sistemi Sabitliyi şöbəsinin əməkdaşı Adam Qloqovski tərəfindən ingilis dilində aparılır. Treninqdə Mərkəzi Bankın Tədqiqatlar, Pul siyasəti, Kredit təşkilatlarının fəaliyyətinə nəzarət, Bazar əməliyyatları, Ödəniş sistemləri və hesablaşmalar departamentlərinin əməkdaşları iştirak edirlər.

Elxan SALAHOV