Yeni “Azercell Ekspress” ofisi açıldı - FOTO

“Azercell” abonentlərinə hər tərəfli xidmət göstərəcək bu yeni ofis Yusif Səfərov küç. 9/16 ünvanında (yeni inşa edilmiş Ali Məhkəmənin yaxınlığında) yerləşir.

“Azercell Ekspress” ofislərində abonentlər eyni yerdə 3 müxtəlif xidmətdən yararlana bilirlər. Burada həm telefon danışığına görə ödəmə həyata keçirmək, həm müştəri xidmətlərindən istifadə etmək, həm də yeni telefon və ya nömrə almaq mümkündür. Qeyd edək ki, “one stop shopping” adlanan bu konsepsiya təkcə Azərbaycanda deyil, ümumiyyətlə regionda ilk olaraq “Azercell” tərəfindən təqdim olunub.

Abonentlərin rahatlığını və operativ xidmət almasını təmin edən bu ofislərin sayı artmaqdadır. Hazırda Bakıda 11, bölgələr üzrə 17 “Azercell Ekspress” ofisi fəaliyyət göstərir. Bununla yanaşı, paytaxtda 4 , regionlarda isə 7 Müştəri Xidmətləri Mərkəzi fəaliyyətdədir. Ümumilikdə, bu il ərzində Qazax və Göyçayda, həmçinin Bakının Yasamal və Səbayel rayonlarında yeni Ekspress ofislərinin açılışı baş tutub.

Müştəri məmnuniyyətinin daim yüksək səviyyədə olmasına önəm verən “Azercell” bundan sonra da Ekspress ofislərin sayını artırmaq niyyətindədir. Belə ki, ilin sonunadək Bakı, Tovuz və Xırdalan şəhərlərində yeni ofislərin açılması planlaşdırılır.