Ağırlıqqaldırma üzrə milli komandamız aprelin 8-də Albaniyanın paytaxtı Tiranada keçiriləcək Avropa çempionatında iştirak edəcək. Lent. az-ın məlumatına görə, burda ölkəmiz 4 kişi və 2 qadın atletlə təmsil olunacaq.
Kişilərin mübarizəsinə Valentin Xristov, Zülfüqar Süleymanov (hər ikisi 62 kq), Sərdar Həsənov (69 kq), İntiqam Zairov (94 kq) qatılacaq. Qadınlar arasında isə Silviya Angelova (48 kq) və Alyona Kiriyenko (69 kq) qüvvəsini sınayacaq.
Qeyd edək ki, Türkiyənin Antalya şəhərində keçirilmiş ötənilki Avropa çempionatında Valentin Xristov 56 kq çəki dərəcəsində qızıl, Silviya Angelova 48 kq çəkidə bürünc medalla təltif edilib. Alyona Kiriyenko elə 69 kq çəkidə 9-cu olub. İntiqam Zairov 94 kq çəkidə birdən qaldırmada uğursuzluqla üzləşib. Zülfüqar Süleymanov isə həmin vaxt dopinq cəzalısı olduğu üçün çıxış etməyib. Ümumilikdə, ölkəmiz 3 qızıl, 2 bürünc medal qazanıb.