Reynaldo milliyə çağrılmasından danışdı: "Hələ dəvət yoxdur" - MÜSAHİBƏ

Lent.az- apasport.az-a istinadən Qarabağ" klubunun braziliyalı futbolçusu Reynaldonun müsahibәsini təqdim edir.

- AFFA rəsmiləri milli komandada oynamağınızda maraqlı olduğundan sizinlə danışıqlar aparılacağı bildirilir. Bundan xəbəriniz varmı?
- Sevinirəm ki, azərbaycanlı azarkeşlər çıxışımdan razıdır. Əgər AFFA rəhbərliyi də oyunumdan razıdırlarsa, buna görə ancaq və ancaq sevinərəm. Amma hələlik rəsmi dəvət yoxdur. Olarsa, ətraflı danışmaq mümkündür.

- AFFA-nın baş katibi Elxan Mәmmәdov sizə görə FİFA-ya müraciət ediləcəyini söyləyib. Bununla yanaşı, baş katib bildirib ki, Reynaldo milliləşdiriləndən sonra "Qarabağ"dan daha güclü kluba keçə və Azərbaycan yığmasına gəlməyə bilər...
- Mәnim "Qarabağ"la 2018-ci ilәdək müqaviləm var. Hәlәlik komandamın uğurları üçün çalışıram. Tәbii ki, qarşıdakı illәrdә mənə böyük təklif gələ və bunu dəyərləndirə bilərəm. Bu da normaldır.

- Təbii ki, daha iddialı kluba getməyiniz normaldı. Başqa ölkәyә gedəcəyiniz təqdirdə, Azәrbaycan millisindәn imtina edərsiniz?
- Xeyr, Azərbaycan yığmasından heç vaxt imtina etmərəm. Әgәr Azәrbaycan millisindә oynamağı qәbul edərәmsә, yığmadan necə boyun qaçıra bilərəm? Bu, mümkün deyil. Yığmada oynasam, “Qarabağ”da olduğu kimi әlimdәn gәlәnin әn yaxşısını edәcәm.

- Elə "Qarabağ"ın Avropa Liqasının qrup mәrhәlәsinə yüksəlməsində də rolunuz az olmadı...

- Qrup mərhələsində oynamaq çox gözәl hissdir. Bildiyiniz kimi, pley-off mәrhәlәsindә Hollandiyanın "Tvente" klubunu mübarizədən kənarlaşdırdıq. İndi bizi çәtin oyunlar gözlәyir. İtaliyanın "İnter", Fransanın "Sent-Etyen" vә Ukraynanın "Dnepr" klublarının yer aldığı qrupdayıq. Nə qədər ağır qrup olsa belə, ikinci yerə iddialıyıq.

- “Qarabağ”ın qrupda ikinci pillәni tutması mümkündü?
- Әlbәttә. Çox yaxşı komandamız var. Ona görә də uğurlu nәticәyә inanıram.

- Avroliqada uğurlu çıxış etsəniz də, eyni sözləri Topaz Premyer Liqası haqda demək olmur...
- Bu mәqam bizi dә düşündürür. Çempionata yaxşı başlamadıq. "Sumqayıt"la oyunda adi bir sәhvdәn texniki məğlubiyyət aldıq. Digәr görüşlərdə heç-heç etdik. Bizim әn böyük problemimiz süni meydanda oynaya bilmәmәyimizdi. Süni ot örtüyündә problemlәr yaşayırıq.

- Bәlkә çempionatı Avroliqaya qurban verdiniz?
- Xeyr, elә demәzdim. Çünki belә niyyətimiz yoxdur.