Millimiz AÇ-nin finalına yüksələ bilmədi

Bakıda keçirilən qadın voleybolçular arasında Avropa çempionatında yarımfinal mərhələsinin oyunları keçirilib. Apasport.az saytının məlumatına görə, 12 il əvvəlki rekordu təkrarlamaqla bu mərhələyə yüksələn yığmamız yeni rekord üçün Hollandiya millisi ilə üz-üzə gəlib.

Gözlənildiyi kimi gərgin keçən qarşılaşma millimizin məğlubiyyəti ilə yekunlaşıb. İlk setdə üstün olan komandamız 25:20 hesabı ilə qalib gəlib. Sonrakı iki hissə isə rəqibin üstünlüyü ilə başa çatıb. Dördüncü setdə möhtəşəm əzmkarlıq göstərən komandamız hesabı bərabərləşdirməyə nail olsa da, yekunda daha təcrübəli olan hollandiyalılar tay-brekdə qalib gələrək adlarını finala yazdırıblar.

Yarımfinalın digər cütündə isə son Avropa çempionu Rusiyanı mübarizədən kənarlaşdıran Türkiyə yığması yarışın əsas favoriti Serbiya ilə üz-üzə gələcək. Qrup mərhələsində uğursuz çıxışından sonra öz oyununu tapan “ay-ulduzlular”ın qarşılaşmada qalib gəlməsi sensasiya sayılmayacaq.

Qeyd edək ki, Avropa çempionatının mükafatçılarının adına sabah aydınlıq gələcək.

Avro-2017

Yarımfinal mərhələsi

30 sentyabr

Hollandiya - Azərbaycan - 3:2 (20:25; 25:19, 25:19, 25:27, 15:12)

Hakimlər: Vladimir Oleynik (Rusiya), Onur Hoşnut (Türkiyə)

Azərbaycan: 1. Ceyran Əliyeva, 2. Kseniya Poznyak, 5. Odina Bayramova, 6. Ayşən Abduləzimova, 7. Olena Həsənova, 8. Yelizaveta Səmədova, 9. Natalya Məmmədova, 10. Yana Kulan, 11. Yekaterina Jidkova, 12. Valeriya Məmmədova, 14. Kristina Yaqubova, 15. Aynur Kərimova, 17. Polina Rəhimova, 18. Şəfaqət Həbibova

Baş məşqçi: Faiq Qarayev

Hollandiya: 1. Kirsten Knip, 2. Femke Stoltenborq, 3. Yon Belien, 4. Seleste Plak, 5. Robin de Kroyf, 6. Maret Balkesteyn-Qrotues, 9. Mirte Şut, 10. Lonneke Sloetyes, 11. Enn Buys, 14. Laura Dijkema, 18. Marrit Yesper, 19. Nika Daalderop, 20. Tessa Polder, 22. Nikole Kulhaas

Baş məşqçi: Ceymi Morrison

20:30. Serbiya – Türkiyə

Hakimlər: Pavel Burkevits (Polşa), Mario Bernaola (İspaniya)