İtaliya millisi Konteyə tapşırıldı

İtaliya millisinin yeni baş məşqçisi Antonio Konte iki illik müqaviləyə imza atıb

Lent.az-ın APA TV-yə istinadən verdiyi xəbərə görə, beləliklə, Braziliyada keçirilən Dünya çempionatındakı uğursuzluqdan sonra İtaliya Futbol Federasiyasının prezidenti seçilən Karlo Tavecçionun ilk işi 45 yaşlı futbol mütəxəssisi Konteni milliyə baş məşqçi gətirmək olub.

Antonio Konte Romadakı imzalama mərasimindəki çıxışında sələfi Çezare Prandellidən də danışıb: "Cənab Prandellini burdan salamlayıram. Ona "Qalatasaray"dakı yeni macərasında uğurlar arzulayıram".

Konte Prandellinin son Avropa çempionatında seçdiyi yolun doğru olduğunu və İtaliya millisinin həmin turnirdə finala qədər yüksəldiyini bildirib.

Yeni baş məşqçi çox yüksək maaş - illik 4 milyon avro alacağı ilə bağlı suallara cavabında deyib ki, maaşının bir hissəsini sponsorlar ödəyəcək.

Qeyd edək ki, Antonio Konte bundan əvvəl "Yuventus"un baş məşqçisi olub. O, İtaliya millisinin çalışdırıcısı vəzifəsində artıq "Qalatasaray"da olan Çezare Prandellini əvəzləyib.