Azərbaycan Kubokunda BÖYÜK FİNAL

Futbol üzrə Azərbaycan Kubokunda finalçılar müəyyənləşib. Lent.az-ın məlumatına görə, mayın 28-də keçiriləcək həlledici qarşılaşmada “Neftçi” və “Xəzər Lənkəran” komandaları üz-üzə gələcəklər.

Yarımfinalda “Neftçi” “Qarabağ”ı, “Xəzər Lənkəran” isə “Bakı”nı iki oyunun cəmində üstələyib. İlk yarımfinal matçında öz meydanında 2:1 hesablı qələbə qazanmış flaqman səfər görüşündə heç-heçəyə nail olub – 2:2. Hesabı “Qarabağ”ın yarımmüdafiəçisi Riçard Almeyda 41-ci dəqiqədə penalti zərbəsi ilə açıb. Bundan cəmi 1 dəqiqə sonra Elvin Yunuszadə bərabərlik qolunu vurub. Fasilədən sonra “Qarabağ” 2-ci qolu vurmaq üçün irəli atılsa da, yenə “Neftçi” fərqlənib. 76-cı dəqiqədə Nikolas Kanales aktivinə növbəti qolu yazıb. Bundan sonra Ağdam təmsilçisinə 3 qol vurmaq lazım gəlirdi. Amma meydan sahiblərinin gücü cəmi 1 topa çatıb. 86-cı dəqiqədə “Neftçi”nin qapıçısı Saşa Stamenkoviçin kobud səhvindən sonra Emeka Opara hesabı bərabərləşdirib.

“Xəzər Lənkəran” isə səfərdə 0:1 hesabı ilə uduzduğu “Bakı”nı evdə 2 cavabsız topla məyus edib. İlk yarıya əlavə olunmuş 1-ci dəqiqədə Ağabala Ramazanov, 81-ci dəqiqədə isə Rahid Əmirquliyev fərqlənib.

Beləliklə, Azərbaycan Kubokuna son illərin ən prinsipial rəqibləri – “Neftçi” və “Xəzər Lənkəran” arasında böyük final matçı ilə yekun vurulacaq.

Elşən MƏMMƏDOV