2015-ci il Avropa Oyunları ilə bağlı Qiymətləndirmə Komissiyası aprelin sonlarında Bakıya səfər edəcək. Bu barədə Lent.az-a Gənclər və İdman Nazirliyinin beynəlxalq əlaqələr şöbəsinin müdiri İlham Mədətov məlumat verib.
O bildirib ki, Avropa Olimpiya Komitəsi nəzdində yaradılmış komissiya Azərbaycan paytaxtında təşkil ediləcək Oyunlara hazırlığı nəzərdən keçirəcək. Qonaqlar ayrı-ayrı növlər üzrə yarışlar üçün nəzərdə tutulmuş qurğularla tanış olacaqlar. Eyni zamanda, nüfuzlu idman tədbirində təmsil olunacaq idman növlərinin tərkibi tam təsdiqlənəcək. Mədətovun sözlərinə görə, hazırda Oyunların proqramına salınmağa namizəd növlərin sayı 20-yə yaxındır. Onların arasından 13 olimpiya və 2 qeyri-olimpiya növü seçiləcək.
Qeyd edək ki, ilk Avropa Oyunlarının 2015-ci ilin iyun-iyul aylarında keçirilməsi nəzərdə tutulub.