Avropa Oyunları ilə bağlı yeni iş yerləri açılacaq

2015-ci ildə Bakıda keçiriləcək I Avropa Oyunları ilə bağlı Əməliyyat Komitəsi fəaliyyətə başlayıb. Lent.az-ın məlumatına görə, bu barədə jurnalistlərə gənclər və idman naziri Azad Rəhimov açıqlama verib.

O bildirib ki, Əməliyyat Komitəsi Olimpiya Kəndində fəaliyyət göstərəcək. Nazirin sözlərinə görə, hazırda müxtəlif ölkələrdən ekspertlər dəvət olunurlar: “Çalışırıq ki, ekspertlər olimpiya oyunları keçirmə təcrübəsinə malik olsunlar. Məsləhətçi vəzifəsinə Daq Arnot dəvət olunub. O, 2012-ci il London Yay Olimpiya Oyunlarının Təşkilat Komitəsində rəhbər vəzifələrdə yer aldığından, böyük təcrübəyə malikdir. Digər vəzifələrə də namizədlərə baxılır, onlarla da müqavilə bağlanılacaq. Mütəxəssislər azərbaycanlı gənclərlə birgə işləyəcəklər. Gənclərimiz bunun sayəsində birgə böyük təcrübə toplayaraq, özləri də gələcəkdə yarış keçirmək üçün lazımi biliyə malik olacaqlar”.

Qeyd edək ki, I Avropa Oyunları 2015-ci il iyunun 12-dən 28-dək 19 növ üzrə təşkil olunacaq.