Avropa Liqasında finala doğru ilk addım

Bu gün UEFA Avropa Liqasının 2014/15 mövsümü yarımfinalının ilk oyunları keçiriləcək. Apasport.az saytının məlumatına görə, hər iki qarşılaşma eyni vaxtda başlayacaq.

Dörd komanda arasında yeganə “Dnepr” böyük beşlik ölkələrindən birini təmsil eləmir. “Napoli”nin qonağı olacaq ukraynalılar bura qədər gəlməklərinin möcüzə olmadığını sübut etmək istəyindədilər. Ancaq bu o qədər də asan olmayacaq.

Təmsilçimiz “Qarabağ”la eyni qrupda mübarizə aparmış Markeviçin yetirmələri qrupdan bəxt sayəsində çıxmaqlarına baxmayaraq digər mərhələlərdən inamla keçərək artıq finalın bir addımlığında dayanıblar.

“Napoli” isə əlinə düşmüş fürsətdən – rəqibin təcrübəsizliyindən maksimum yararlanaraq adını finala yazdırmaq istəyir.

Digər cütlükdə isə qüvvələr nisbətini bərabər saymaq olar. “Sevilya” öz meydanında “Fiorentina”nı qəbul edəcək.

İspaniyalılar bu oyuna qədər İtaliya təmsilçiləri ilə 4 oyun keçirib ki, bunların heç birində qələbə qazana bilməyib. Elə “Fiorentina”nın da bu baxımdan üstünlüyü yoxdur. Pireneylilərə qarşı 10 oyun oynamış florensiyalılar bunlardan cəmi ikisində qələbə sevinci yaşaya bilib.

Maraqlı keçəcəyi gözlənilən oyunun aşkar favoriti olmasa da, ev sahibi kimi andalusiyalıları fərqləndirə bilərik.

Avropa Liqası

Yarımfinal, ilk oyunlar

7 may

00:05. “Napoli” (İtaliya) – “Dnepr” (Ukrayna)

Baş hakim: Sveyn Moen (Norveç)

Neapol. San Paolo stadionu

00:05. “Sevilya” (İspaniya) – “Fiorentina” (İtaliya)

Baş hakim: Feliks Brix (Almaniya)

Sevilya. Ramon Sançes Pisxuan stadionu