"Xəzər Lənkəran" a xoş müjdə: "Arşavini pul maraqlandırır"

“Andrey Arşavin çox qəliz insandır. Ona elə gəlir ki, hər şeydə, o cümlədən biznesdə özü hər şeyi həll edə bilər. Ona məsləhət lazım deyil”. Apasport.az saytının məlumatına görə, bu sözləri tanınmış rusiyalı futbol agenti Vladimir Abramov deyib.

Vaxtilə Rinat Dasayev, Fyodor Çerenkov, Anatoli Bışovets kimi tanınmışların agenti olmuş mütəxəssis Rusiya yığmasının futbolçusu Andrey Arşavinin menecerlərlə çalışmadığını açıqlayıb.

Abramov Avstraliya və Azərbaycandan təkliflər alan hücumçunun seçiminin maliyyə məsələsindən asılı olacağını bildirib: “Arşavinə İngiltərədə “smart ass” ləqəbi qoyublar. Andrey agentlə işləməyi xoşlamır. Ona elə gəlir ki, hər şeyi özü həll edə bilər. Onu “Arsenal”a aparan agentdən də imtina etdi. Arşavin fikirləşir ki, klubu ilə özü danışa bilər. İndi də müqaviləsinin başa çatmasını gözləyir. Bundan sonra daha çox pul təklif edən kluba keçəcək”.

Qeyd edək ki, İngiltərə “Arsenal”ında ehtiyatda qalan Arşavinin “Xəzər Lənkəran”a keçəcəyi iddia edilir.