“Şaxtyor” futbol klubu tarixində 8-ci dəfə Ukrayna çempionu adını qazanıb. Lent.az-ın məlumatına görə, baş məşqçi Mirça Luçeskunun komandası növbəti qızıl medalı sona 4 tur qalmış təmin edib.
“Metallist”lə qarşılaşmada 1:1 hesablı heç-heçəyə nail olan “Şaxtyor” ən yaxın izləyicisi Kiyev “Dinamo”sunu 15 xal geridə qoyub. “Dnepr”i 2:0 hesabı ilə məğlub etməsi də “Dinamo”nun qızıl medal ümidlərinə yardımçı olmayıb.
Qeyd edək ki, “Şaxtyor” ardıcıl 4-cü mövsüm Ukrayna çempionluğuna nail olub. 8 çempionluqdan 7-si isə Mirça Luçeskunun 2004-cü ildən start götürən baş məşqçiliyi dövrünə təsadüf edib.