“Neftçi”nin hücumçusu rekord vurdu

Bakının “Neftçi” klubunun futbolçusu Nikolas Kanales Azərbaycan çempionatları tarixinə düşüb. Lent.az-ın Peşəkar Futbol Liqasının rəsmi saytına istinadən verdiyi məlumata görə, çilili hücumçu 1992-ci ildən start götürən ölkə birincilikləri tarixində 1 mövsümdə ən çox qol vuran legioner olub.

Kanales Topaz Premyer Liqasının XXV turunun “Qarabağ”la oyununda fərqlənməklə vurduğu qolların sayını 21-ə çatdırıb. Forvard bu qolla “Kəpəz”in gürcüstanlı legioneri Badri Kvaratsxeliyanı arxada qoyub.

Fevralın 23-də XXI turun “İnter”lə oyununda qol vurmaqla 20-yə çatan Kanales sonrakı 3 matçda qol həsrəti yaşayıb. Kvaratsxeliya ilə şərikli rekordu 42 gün sürən çilili mütləq rekordunu ilk “altılığ”ın 3-cü turunda rəsmiləşdirib.

Azərbaycan çempionatında 1 mövsümə ən çox qol vuran 5 futbolçu

yer	futbolçu	klub	mövsüm	ölkəsi	oyun	qol
1	Nikolas Kanales	Neftçi (Bakı)	2012/13	Çili	25	21
2	Badri Kvaratsxeliya	Kəpəz (Gəncə)	1997/98	Gürcüstan/Azərbaycan	22	20
3	Georgi Adamiya	Qarabağ (Ağdam)	2010/11	Gürcüstan	30	18
4	Oqtay Dərəlioğlu	Xəzər Lənkəran	2004/05	Türkiyə	21	17
5	Valter Quqlemon	İnter (Bakı)	2008/09	Uruqvay	24	17