“İnter” Robertinyo ilə anlaşdı

Transfer pəncərəsinin bağlanmasına az qalmış “İnter” yeni futbolçuyla razılığa gəlib. Lent.az-ın apasport.az saytına istinadən verdiyi məlumatına görə, Gürcüstanın “Dinamo” (Tbilisi) komandasının üzvü Roberto Suares Anginetti cari mövsümün sonunadək “bankirlər”in uğurları üçün çalışacaq.

Robertinyo kimi tanınan braziliyalı futbolçu hücum mövqeyində oynayır. O, sol vinger kimi çıxış edə bilir. Ölkəsində “Amerika Mineyro” klubunun əsas heyətinə düşə bilməyən Robertinyo 2010-cu ildən Tbilisi “Dinamo”sunun uğurları üçün çalışıb. O, cari mövsümdə 14 oyun keçirib və 1 qol vurub. Batumi “Dinamo”sunun qapısına yol tapan futbolçu daha bir dəfə də ölkə kubokunda fərqlənib.

Futbolçu azad agent olduğundan, “İnter”ə pulsuz başa gəlib. Robertinyo ilə 6 aylıq müqavilə bağlanıb və adı artıq PFL-ə təqdim olunub. Maraq üçün onu da qeyd edək ki, Kaxaber Sxadadze bu futbolçunu hələ ötən mövsümdən almaq istəyirdi.

Xatırladaq ki, qış fasiləsində “İnter” daha bir futbolçuyla Yuri Fomenkoyla müqavilə imzalamışdı.