“Mançester Yunayted” və Rusiya yığmasının sabiq futbolçusu Andrey Kançelskisin apasport.az saytına müsahibəsi
- Mayın 1-də Bakıda veteranlar arasında keçiriləcək yoldaşlıq görüşünə dəvət olunmağınız sizi təəccübləndirmədi ki?
- Əlbəttə, təəccübləndirdi. Açığı, bu dəvəti gözləmirdim. İstənilən halda, dəvət olunmağım xoşdur. Aprelin 30-da paytaxtınızda olacağam.
- Bakıda sonuncu dəfə nə vaxt olmusunuz?
- 4 il əvvəl. Bakı çox gözəl şəhərdir, xoşuma gəldi. Paytaxtınız yeni tikililər sayəsində müasirləşib. İnsanlarınız da çox mehribandır. Bir sözlə, Bakını sevdim.
- Azərbaycanda nə vaxt oynadığınızı xatırlayırsınız?
- SSRİ dövründə. Onda Kiyev “Dinamo”sunun heyətində “Neftçi” ilə matça gəlmişdim. Sovet İttifaqı dağılandan sonra 4 il öncəyə kimi Bakıda olmamışdım.
- Siz vaxtilə işlədiyiniz “Nosta” klubuna himayədarlıq edən azərbaycanlı iş adamının dəvətilə paytaxtımıza gəlmişdiniz?
- Mən həmin klubda baş direktor idim. Həmin azərbaycanlı ilə yaxşı əlaqəm vardı, məni Bakıya qonaq çağırmışdı. Hətta toyda da oldum.
- Azərbaycan toyu sizdə hansı təəssürat oyatdı? Sizdəkindən çoxmu fərqlənir?
- Təbii ki, çox fərqlənir. Toya çoxlu insanlar gəlir, çox maraqlı şeylər olur. Aydın məsələdir ki, Azərbaycan toyunun öz ənənəsi var və iştirakım mənim üçün maraqlı oldu.
- Bizdə toya pul yazdırırlar. Bu, sizi təəccübləndirmədi?
- Əslində, bizdə də bəy-gəlinə pul verirlər. Ancaq sizdə bu, daha geniş, açıq olur. Sizinkilər öz səxavətlərini göstərirlər. Toyda yeyib-içməkləri, oynamaqları da öz yerində.
- Bakıdakı yoldaşlıq görüşündə heyətində yer alacağınız Avropa yığmasında dəvət olunan futbolçular haqda məlumatlısınız?
- Geniş məlumatım yoxdur. Gələndə görərik.
- Gələnlər arasında Hakan Şükür, Rüştü Rəcbər, Vagiz Xidyatullin, Bernd Şuster, Şota və Arçil Arveladze qardaşları olacaq, hətta milli komandamızın baş məşqçisi Berti Foqts da oynayacaq...
- Əlbəttə, onlarla bir komandada olmaq, oynamaq, ünsiyyət qurmaq xoşdur.
- Bakıda öz məharətinizi göstərə biləcəksiniz?
- Normal formadayam. Təbii ki, əvvəlki səviyyədə deyiləm. Hər halda, meydanda 45 dəqiqə yüksək tempdə oynamağa dözərəm.
- Azərbaycanlı veteran futbolçulardan kiminlə şəxsi tanışlığınız var?
- Praktiki olaraq tanışlarım yoxdur. SSRİ dağılandan sonra mən İngiltərəyə getdim. Sizinkilərdən az-çox Aleksandr Jidkovla əlaqəm olub, ünsiyyət qururam. O, Kiyev “Dinamo”sunun, “Neftçi”nin, milli komandanızın qapıçısı olub. Açığı, sizinkilərdən başqa heç kimlə əlaqəm yoxdur.
- Deməli, Azərbaycan futbolu haqda məlumatınız azdır...
- Mətbuat vasitəsilə informasiyalar əldə edirəm. Bilirəm ki, uzun müddətdir millinizin baş məşqçisi postunda Berti Foqts işləyir. Ancaq sizi aldatmayacağam, futbolunuz haqda az məlumatım var.
- Foqts vaxtilə Şotlandiya yığmasını çalışdırıb ki, siz də bu ölkədə oynamısınız. Təsadüfən həmin vaxt onunla yollarınız kəsişməyib?
- Yox.
- Məşqçisi olduğunuz “Volqa”da sizə qədər azərbaycanlı futbolçu oynayıb...
- Hə, bunu bilirəm, Vaqif Cavadovu deyirsiniz. Komandadakılar onun haqda danışırdı.
- Müsbət mənada, yoxsa? Vaqif yarım ildən sonra “Volqa”dan gedəsi oldu...
- Futbolçunun qısa müddətdən sonra komandadan getməyi normal şeydir. Bir klubda oyunu alınır, digərində yox. Bildiyimə görə, Cavadov yaxşı futbolçudur. Onun burda karyerası alınmayıb.
- “Rubin”də millimizin müdafiəçisi Ruslan Abışov oynayır. Onu tanıyırsınız?
- Əlbəttə. Rusiyada kim oynayırsa, onun haqda informasiya əldə edirik. Burada futbolçular haqda məlumatlar az deyil. Sadəcə, Rusiyada Azərbaycan yox, Avropa çempionatları haqda informasiyalar çoxdur.
- Yeri gəlmişkən, sizdən sonra “Mançester Yunayted”də oynamış Trinidad və Tobaqodan olan hücumçu Duayt York da Bakıya dəvət olunub...
- O da Bakıya gələcək?
- Bəli, deyilənə görə, artıq razılığını verib...
- Əla. Onunla da ünsiyyət quraram. Belə tanınmış futbolçuları bir araya gətirməyiniz çox yaxşıdır.
Mehman SÜLEYMANOV
“Bakıdan gələn təklif məni təəccübləndirdi”
1085