Sampaoli "Qarabağ"la oyun haqda: "Bu, işimizi çətinləşdirəcək"

“Sıx qrafiklə oyunlar keçirəcəyimiz dövrə qədəm qoyuruq. Klubun məqsədlərinə çata bilmək üçün rotasiyalar etməli olacağıq".

Lent.az-ın Apasport.az-a istinadən məlumatına görə, bunu “Marsel”in baş məşqçisi Xorxe Sampaoli Konfrans Liqasının pley-off mərhələsində “Qarabağ”la keçiriləcək oyunöncəsi mətbuat konfransında deyib.

Argentinalı çalışdırıcı “Velodrom” stadionunda baş tutacaq ilk qarşılaşma ilə bağlı bu fikirləri səsləndirib: “Bütün oyunçular "Qarabağ"la matça hazırdır. Hamıya eyni dərəcədə əhəmiyyət veririk. Bütün futbolçular oynamaq üçün hər zaman hazır olmalıdırlar".

Sampaoli istefaya göndəriləcəyi ilə bağlı yayılan söz-söhbətlərə də münasibət bildirib: “Futbolda baş məşqçinin taleyini nəticələr müəyyən edir. Biz buna görə mühakimə olunuruq. Qalib gəlmədikdə meydanda baş verənlərə görə günahkar oluruq. Təzyiqlə hər yerdə qarşılaşmışam. Amma hər dəfə bir müddət postumda qalmaq mənə qismət oldu. Məqsədim həmişə oyun fəlsəfəmi möhkəmləndirməkdir. Lakin nəticələr bizim peşəmizi həssas edir”.

Sampaoli sabahkı qarşılaşmada aparıcı oyunçulara şans verəcəyini söyləyib: “Konfrans Liqası heç vaxt qarşılaşmadığım oyunçuları tanımağa imkan verəcək yeni yarışdır. Mənim üçün şəxsi çağırışdır. “Qarabağ” turnirin qrup mərhələsində topa ən çox sahib olan komandadır. Sabah da, bazar günü “Klermon”la görüşdə də, həmçinin “Qarabağ”la cavab matçında da ən güclü oyunçular çıxış edəcəklər. Üstəlik, uzun məsafə qət etməli olacağıq. Ancaq motivasiya eyni olaraq qalır”.

Çalışdırıcı əsas hədəflərinin Çempionlar Liqasına vəsiqə qazanmaq olduğunu gizlətməyib: “Qarabağ” zəngin beynəlxalq təcrübəyə malik oyunçulara sahibdir. Bu mənada həm “Velodrom”da, həm də evlərində belə matçlara öyrəşmiş komandaya qarşı oynamaq işimizi çətinləşdirəcək. Çətinlik həm də hazırlığın qısa müddətdə olmasından qaynaqlanır. “Qarabağ”la iki görüş arasında çempionat oyunumuz da olacaq. Klubun məqsədi Çempionlar Liqasına vəsiqə qazanmaqdır. Hər səhv bizə böyük zərər vura bilər”.

Qeyd edək ki, sabah keçiriləcək “Marsel” – “Qarabağ” matçı Bakı vaxtı ilə saat 00:00-da start götürəcək.