İran millisi 2025-ci ilə qədər Rusiya ilə oynaya bilməyəcək

İran milli futbol komandası sıx matç qrafiki səbəbindən ən azı 2025-ci ilə qədər Rusiya komandası ilə oynaya bilməyəcək.

Lent.az xarici mediaya istinadən bildirir ki, bu barədə İranın futbol federasiyası məlumat yayıb.

“Noyabrda və gələn il Rusiya millisi ilə cavab oyunu mümkün deyil. Rəsmi və yoldaşlıq oyunları üçün bütün günlər doludur”, - İran Futbol Federasiyasının mətbuat xidməti bildirib.

İran millisi Qətərdə keçirilən dünya çempionatında iştirak edib.

Rusiya və İran milli komandaları 2023-cü ilin martında Tehranda qarşılaşıb. Görüş 1:1 hesabı ilə heç-heçə başa çatıb. Qolları Anton Mirançuk (penalti) və Mehdi Taremi (penalti) vurub.

Beynəlxalq Futbol Federasiyası (FIFA) və Avropa Futbol Assosiasiyaları İttifaqı (UEFA) 2022-ci ilin yazında Rusiya millisinin, eləcə də bütün Rusiya klublarının bu təşkilatların nəzarətində olan bütün yarışlarda iştirakını dayandırmaq qərarına gəlib.

Rusiya millisi 2023-cü ildə beş yoldaşlıq oyunu keçirib (martda - İran və İraqla, sentyabrda - Qətərlə, oktyabrda - Kamerun və Keniya ilə).