Çempionlar Liqası oyununda diqqət çəkən hadisə: Hakim ağladı

Ötən gecə Çempionlar Liqasında keçirilən “Leypsiq” – “Aston Villa” görüşündən sonra son oyununa çıxan köməkçi hakim göz yaşlarına boğulub.

Lent.az-ın xarici KİV-ə istinadla xəbərinə görə, "Leypsiq"in baş məşqçisi Marko Rouz oyunun sonunda göz yaşlarına boğulan köməkçi hakim Alessandro Callatiniyə təsəlli verib.

Çempionlar Liqasının 6-cı həftəsində "Leypsiq" "Aston Villa"nı qəbul edib. Leypsiq stadionunda keçirilən görüşdə qonaq komanda 3:2 hesabı ilə qalib gəlsə də, oyundan sonra duyğulu anlar yaşanıb.

Final fiti çalındıqdan sonra köməkçi hakim göz yaşlarını saxlaya bilməyib. "Leypsiq"in baş məşqçisi Marko Rouz 3:2 hesablı məğlubiyyətin kədərini bir kənara qoyub, hakimə təsəlli verməyə çalışıb.

Alessandro Callatininin göz yaşlarının səbəbi sonradan məlum olub. "Bild"ə danışan "Leypsiq"in baş məşqçisi Rouz deyib: "Ondan nə olduğunu soruşdum. Dedi ki, 49 yaşı var və bu gün son oyununa çıxıb. Ona forma hədiyyə etdik".

Alman məşqçi Callatini təbrik etdiyini və ailəsi ilə daha çox vaxt keçirəcəyini söyləyərək təsəlli verdiyini bildirib.