"Barselona" Messi üçün vida oyunu təşkil edəcək

"Barselona"nın idman direktoru Deko komandanın keçmiş hücumçusu Lionel Messi ilə vida oyununun təşkili ilə bağlı məlumatı təsdiqləyib.

Lent.az bildirir ki, bu barədə “Marca” xəbər verir.

“Düşünürəm ki, bu, vida oyunu olacaq, amma ola bilsin ki, stadionun yenidən qurulmasından sonra. O, həmişə klubun tarixində ən böyük kumir olacaq. Klubun Kroyff, Ronaldo kimi böyük kumirləri var idi, amma o, bəlkə də hamıdan böyükdür. O, mütləq vida oyununu “Barselona”da keçirəcək, amma nə vaxt olacağını bilmirik. O oynayır və ümid edirəm ki, daha uzun illər oynayacaq, çünki futbolu sevən, ondan həzz alan insanlar onu görməyə şad olacaqlar”, - Deko bildirib.

Messi 2000-ci ildən “Barselona” akademiyasında olub. 2003-cü ildə o, kataloniyalıların əsas komandasında debüt edib. Ümumilikdə argentinalı “Barsa”nın heyətində 778 oyun keçirib, bu oyunlarda 672 qol vurub və 303 məhsuldar ötürmə verib. 2021-ci ilin yayında Messi "Barselona"dan ayrılaraq PSJ-nin oyunçusu olmuşdu.

Barselonadakı "Kamp Nou" stadionu ötən yay təmirə bağlanıb. Stadionun təkmilləşdirilməsinin 2026-cı ilə qədər başa çatdırılması gözlənilir.