48 yaşlı gimnast 9-cu dəfə Olimpiadaya getmək istəyir

İdman gimnastikası üzrə olimpiya çempionu Oksana Çusovitina 2024-cü ildə Parisdə keçiriləcək Olimpiadada iştirak etmək niyyətində olduğunu açıqlayıb.

Lent.az xarici mediaya istinadla bildirir ki, ötən həftə Özbəkistanı təmsil edən 48 yaşlı gimnast Xançjouda keçirilən 19-cu Yay Asiya Oyunlarında çıxış edərək, tullanmada dördüncü yeri tutub.

“Asiya Oyunlarında hiss etdim ki, hər şey tədricən normala qayıdır, uğur qazanmağa başlayıram. Nəticələr çıxardım, indi hazırlaşıb gələn il Parisdə keçiriləcək Olimpiya Oyunlarına vəsiqə qazanmağa çalışacağam.

Məni heç nə motivasiya etmir. Mən bunu bəyənirəm, həzz alıram, gimnastikanı sevirəm.Uğur qazanıb-qazanmayacağım, bacarıb-bacarmayacağım başqa məsələdir. Cəhd etməsəm, sonra peşman olaram. Mən bunu dəqiq bilirəm. Və buna görə də risk etmək istəyirəm.

Kvalifikasiya 2024-cü ilin fevralında başlayacaq. Bədii gimnastika üzrə eyni vaxtda dörd Dünya Kuboku keçiriləcək. Üç ən yaxşı idmançı Olimpiadaya buraxılacaq. Bunun üçün siz reytinqdə birinci və ikinci yerləri tutmalısınız. Mən özüm də maraqlanıram, mübarizə aparacağam və hər şeyimi verməyə çalışacağam ki, hər şey mənim üçün olsun”, - Çusovitina bildirib.

Oksana Çusovitina Olimpiya Oyunlarında iştirak sayına görə gimnastlar arasında rekordçudur. O, 1992-ci ildən 2020-ci ilə qədər hər Yay Olimpiya Oyunlarında iştirak edib. O, 1992-ci ildə Barselonada komanda çempionatında qızıl, 2008-ci ildə Pekində tullanmada gümüş medal qazanıb.