AFFA idman jurnalistlərini təbrik etdi

Əvvəlcə AFFA rəsmisi, Futbol Akademiyasının direktoru Elnur Məmmədov jurnalistləri idman qurğusunun əsas meydançasının imkanları ilə tanış edib. Arenaya döşənən süni örtüklü meydançanın üstünlüklərindən danışan akademiya direktoru stadiona FİFA tərəfindən 2 ulduz sertifikatının verildiyini bildirib. Mətbuat işçiləri konfrans zalı, paltardəyişmə otaqlarına da baxış keçiriblər.

Daha sonra AFFA-nın baş katibi Elxan Məmmədov Milli Mətbuat günü münasibətilə federasiya prezidenti Rövnəq Abdullayev adından jurnalistlərə təbriklərini çatdırıb. E.Məmmədov ölkəmizdə futbolun inkişafı məqsədilə məqsədyönlü tədbirlər həyata keçirildiyini deyib, futbolun təbliğində mətbuatın böyük rolu olduğunu bildirib. Baş katib AFFA-nın əsas prioritetlərindən birinin infrastrukturun inkişafı oluduğunu söyləyib və AFFA Futbol Mərkəzinin inşa olunmasını bu istiqamətdə əldə olunan uğurlardan biri kimi dəyərləndirib. Çıxışının sonunda Elxan Məmmədov jurnalistləri bir daha təbrik edib, onlara yeni-yeni yaradıcılıq uğurları arzulayıb. Sonra jurnalistlərə AFFA-nın hədiyyələri təqdim olunub.