“Baku Cup” başlayır

Yarışın təşkilat komitəsindən Lent.az-a verilən məlumata görə, 9 gün davam edəcək turnirə dünyanın məşhur raketka ustaları qatılacaqlar.

Onlardan WTA-nın son reytinq siyahısında ilk “30-luq”da olan Vera Zvonaryova (3-cü yer), Anastasiya Pavlyuçenkova (14-cü yer) və Yekaterina Makarova (29-cu yer) kimi məşhur tennisçilər xüsusi qeyd edilməlidir. Turnirdə həmçinin, Rusiya, Çexiya, Macarıstan, Rumıniya, İspaniya, Fransa, Serbiya, Avstriya, İtaliya, Hindistan, Yaponiya, Böyük Britaniya, Belarus, Ukrayna, Qazaxıstan təmsilçiləri ilə yanaşı, Azərbaycan tennisçisi də mükafat uğrunda mübarizə aparacaq. Azərbaycanda və Cənubi Qafqaz regionunda ilk dəfə keçiriləcək mötəbər “Baku Cup” turnirində ölkəmizi 16 yaşlı gənc tennisçi Kamilə Fərhad təmsil edəcək.

Qeyd edək ki, “Baku Cup”un ümumi mükafat fondu 220 000 dollardır. Analoji turnir bu ildən etibarən hər ilin 30-cu həftəsində Bakı Tennis Akademiyasında keçiriləcək.