“Bakı” milli komandanın futbolçusu ilə gücləndi

“Bakı” klubu Litva millisinin futbolçusu Deyvidas Çesnauskisi transfer edib. Lent.az-ın klubun rəsmi saytına istinadən verdiyi məlumata görə, 30 yaşlı müdafiəçi ilə 2013-cü ilin yayınadək müqavilə bağlanılıb.

Çesnauskis “Bakı”nın Sloveniyada keçirdiyi təlim-məşq toplantısına qatılıb.

1981-ci il iyunun 30-da anadan olan Çesnauskisin futbolçu karyerası Litvanın “Ekranas” klubunda başlayıb. 1997 - 2000-ci illərdə Panevejis klubunun şərəfini qoruyan müdafiəçi ardından Rusiyanın “Dinamo” (Moskva) komandasına keçib. O, 2003-cü ilədək “Dinamo”nun şərəfini qoruyub. Çesnauskis 2004-cü ildə Moskvanın digər iddialı klubu “Lokomotiv”ə keçib. O, 2005 - 2009-cu illərdə Şotlandiya “Harts”ında da çıxış edib. Litvalı futbolçu “Harts”ın heyətində 68 oyuna 5 qol vurub.

2009-cu ildə Yunanlstan təmsilçisi “Erqotelis”lə anlaşan futbolçu 24 oyuna 2 dəfə fərqlənib. O, 2010-cu ildə ünvanını “Aris”ə dəyişib. Çesnauskis ötən mövsüm 15 oyuna çıxıb. Litva milli komandasının heyətində 37 oyun keçirib, 4 qola imza atıb. Boyu 181 sm-dir.