“Xəzər Lənkəran” 6 yeni transferini təqdim etdi

“Xəzər Lənkəran” klubu yay transfer dövründə müqavilə bağladığı 6 yeni futbolçunu təqdim edib. Lent.az-ın klubun rəsmi saytına istinadən verdiyi məlumata görə, bunlar Oliveyra Eder Bonfim, Rikardo Vilana Qomeş, Marius Onofraş, Joao Pinto Ribeyro Paulo, Çaba Borbeli və Veldin Muharemoviçdir.

30 yaşlı braziliyalı Oliveyra Eder Bonfim əsasən sağ cinah müdafiəçisi mövqeyində oynayır. Karyerasının son üç mövsümünü Rumıniyada keçirmiş Ederin axırıncı klubu “Styaua” (Buxarest) olub. Bundan əlavə o, bir çox Portuqaliya klubunda çıxış edib ki, onların arasında “Benfika” və “Braqa” da olub. Bonfim ötən mövsüm Avropa Liqasında “Liverpul”un qapısından qol keçirməklə də yadda qalıb. Onunla 1 illik müqavilə imzalanıb.

Rikardo Vilana Qomeş həmyerlisi Bonfimlə birgə ötən mövsüm “Styaua”nın şərəfini qoruyub. Mərkəz yarımmüdafiəçisi mövqeyində çıxış edir. Bu klubun heyətində ötən mövsüm Avropa Liqasında çıxış etməklə yanaşı, daha əvvəl Rumıniyanın digər klubu “Unirya” ilə Rumıniya çempionu olub və Çempionlar Liqasında oynayıb. Rikardo Qomeş “Xəzər Lənkəran”la 2 illik müqavilə bağlayıb.

30 yaşlı rumıniyalı Marius Onofraş cinah yarımmüdafiəçisi və hücumçu amplualarında çıxış edir. O da ötən mövsümü “Styaua”nın heyətində keçirib. Bundan əlavə, Onofraş Rumıniyanın müxtəlif klublarında forma geyinib, “Xəzər Lənkəran” isə onun vətənindən kənarda oynadığı ilk klubdur. “Unirya”nın heyətində 2009/2010-cu il mövsümündə Çempionlar Liqasında oynamış təcrübəli futbolçu “Qlazqo Reyncers”ə vurduğu qolla da yadda qalıb. Futbolçu ilə komanda arasına 1 illik müqavilə imzalanıb.

31 yaşlı portuqaliyalı mərkəz hücumçusu Joao Pinto Ribeyro Paulo karyerasına “Boavişta” klubunda başlayıb. Portuqaliyanın müxtəlif komandalarında çıxış etmiş Pinto, həmçinin Rumıniyanın “Rapid Buxarest”, son mövsümdə isə Kiprin “Olimpiakos Nikosiya” klubunun şərəfini qoruyub. Forvard Kipr klubunun heyətində 16 qol vurmağı bacarıb. “Xəzər Lənkəran” Pinto ilə 2 illik müqavilə bağlayıb.

Macarıstan əsilli Rumıniya vətəndaşı olan 31 yaşlı hücumçu Çaba Borbeli yaşadığı ölkənin müxtəlif klublarının heyətində 200-dən artıq oyun keçirib. Son mövsümdə isə çempion “Otseselul Qalati”nin şərəfini qoruyub. Futbolçu ilə “Xəzər Lənkəran” arasında 1 illik müqavilə imzalanıb.

Komandaya son qoşulan bosniya və herseqovinalı müdafiəçi Veldin Muharemoviç karyerası ərzində ölkəsinin “Sarayevo” və Belçikanın “Lokeren” komandalarında çıxış edib. Bir neçə dəfə yığma komandaya da çağırılan Muharemoviçin 27 yaşı var. Onunla “Xəzər Lənkəran” arasında 1 illik müqavilə bağlanılıb.