“Neftçi” və “Pünik”in oyun üslubları bir-birinə bənzəyir”

“Bu gün iki güclü komandanın görüşünün şahidi olduq. Təsadüfi deyil ki, hər iki klub öz ölkəsinin çempionudur və Çempionlar Liqasının ikinci təsnifat mərhələsində iştirak edəcək”. Lent.az-ın məlumatına görə, bu sözləri yoldaşlıq görüşündə “Neftçi” üzərində 1:0 hesablı qələbədən sonra Çexiyanın “Viktoriya” klubunun baş məşqçisi Pavel Vrba klubumuzun rəsmi saytına açıqlamasında deyib.

Çex mütəxəssis sözlərinə belə davam edib: “Oyun bərabər mübarizə şəraitində keçdi. Qolumuzu rəqibin baş məşqçisi meydana gənc oyunçuları buraxdıqdan sonra vurduq. Hər halda, komandamdan razı qaldım. "Neftçi"yə Çempionlar Liqasında uğurlar arzulayıram”.

Lakin Vrba “Viktoriya”nın rəsmi saytına açıqlamasında fərqli fikirlər səsləndirib. Onun fikrincə, komandası layiqli qələbə qazanıb. Baş məşqçi oyun ərzində daha yaxşı və daha aktiv təsir bağışladıqlarını bildirib. Vrba xüsusən, ikinci yarıda komandamızın heç nə etməsinə imkan vermədiklərini söyləyib. O, flaqmanla yoldaşlıq görüşünün əhəmiyyətindən də danışıb. Vrbanın fikrincə, “Neftçi” “Viktoriya”nın Çempionlar Liqasının II təsnifat mərhələsində görüşəcəyi Ermənistan “Pünik”i ilə eyni oyun keyfiyyətlərinə malikdir: “Neftçi” və “Pünik” komandalarının oyun üslubu bir-birinə çox oxşardır”.