Türkiyədəki səfirimiz Azərbaycan yığmasını qəbul edib

Azərbaycanın Türkiyədəki səfiri Faiq Bağırov Ankarada boks üzrə Avropa çempionatında çıxış edən milli komandamızın üzvlərini qəbul edib. Azərbaycan Boks Federasiyasının (ABF) mətbuat xidmətindən Lent.az-a verilən məlumata görə, səfir 3 boksçumuzun yarımfinala vəsiqə qazanması münasibətilə idmançıları təbrik edərək, onlara uğurlar arzulayıb.

ABF-nin I vitse-prezidenti Ağacan Abiyev səfirə qitə çempionatı haqqında məlumat verib. O, artıq 3 medalın təmin edildiyini deyərək, Ankara İdman Sarayında himnimizin səsləndirilməsinin də vacib olduğunu bildirib: “1/4 final mərhələsinin görüşləri çox gərgin keçdi. 91 kq çəki dərəcəsində mübarizə aparan Teymur Məmmədovun Rusiya boksçusu üzərində qələbəsini xüsusilə fərqləndirərdim. Teymur döyüşə çıxarkən cəmi 83 kq idi. Ancaq o görüşü düzgün quraraq, qələbə qazana bildi. Elvin İsayev 1/8 finalda Türkiyə boksçusu Fatih Keleşə uduzmamışdı. Həmin döyüşdə əslində İsayev rəqibini 2 xal fərqlə üstələmişdi. Amma sonda 24:23 hesabı ilə qələbəni rəqibə verdilər”.

Abiyev sonuncu dəfə Avropa çempionatında qızıl medalın 1993-cü ildə qazanıldığını xatırladaraq, həmin yarışın da Türkiyədə keçirildiyini deyib: “1993-cü ildə Bursada Rövşən Hüseynov fəxri kürsünün ən yüksək pilləsinə qalxmışdı. İnanıram ki, qardaş ölkə bizə yenə düşərli olacaq”.

ABF-nin I vitse-prezidenti üzərində Heydər Əliyevin rəsmi olan xüsusi medalı səfirə təqdim edib. Faiq Bağırov yarımfinal görüşlərinə də gələrək, boksçularımıza dəstək olacağını bildirib.