“Qəbələ” “Şaxtyor”dan futbolçu transfer edə bilər

Ötən həftə “Qəbələ” Futbol Klubunun nümayəndələri Donetskin “Şaxtyor” klubunun dəvəti ilə Ukraynaya yollanıblar. Lent.az-ın məlumatına görə, klublararası əməkdaşlıq istiqamətində keçirilən görüşdə “Qəbələ”ni icraçı direktor Alastair Saverimutto və baş menecer Zaur Əzizov təmsil ediblər.

İki günlük səfər çərçivəsində “Qəbələ” nümayəndələri əsas, əvəzedici və akademiya bazaları, məşq meydançaları və eyni zamanda iki il öncə istifadəyə verilmiş “DonBass Arena” stadionu ilə tanış olublar. Z. Əzizov səfər zamanı keçirilən görüşlər barədə açıqlama verib: “Şaxtyor”un infrastrukturu ilə yaxından tanış olduq. Həqiqətən də klubun həm stadionu, həm bazası Avropanın öndə gedən klublarını hər mənada üstələyir. Təsadüfi deyil ki, gələn il keçiriləcək Avropa çempionatı zamanı milli komandalardan birinin məhz “Şaxtyor”un bazasında yerləşdirilməsi planlaşdırılır. Səfər zamanı klubun akademiya nümayəndələri ilə də görüşümüz oldu. “Şaxtyor”un akademiyası hollandiyalı mütəxəssis Patirk van Leuvenin rəhbərliyi altında çox ciddi işlər görür və əsas komandaya artıq 3 oyunçu veriblər. Klubun marketinq, kommersiya və strategiya departamentinin direktoru ingilis Josep Palmerlə klublar arası əməkdaşlıq barəsində fikir mübadiləsi apardıq və onun da önümüzdəki mövsüm Qəbələyə dəvət etməyi düşünürük”.

“Şaxtyor”dan futbolçu transferi mümkündürmü” sualına isə Əzizov belə cavab verib: “Reallığı nəzərə alsaq, hazırda “Şaxtyor”dan futbolçu transfer etməyimiz mümkünsüzdür. Amma klubun baş direktoru Sergey Palkinlə görüş zamanı, o, hazırda müxtəlif klublarda icarədə olan “Şaxtyor”un futbolçuları barədə gələcək təklifləri dəyərləndirəcəklərini bildirdi. Məşqçilər korpusu ilə görüşdükdə, bu məsələni də onların diqqətinə çatdıracağam və ola bilsin ki, mövsüm ərzində bu futbolçuların çıxışlarını mütəmadi olaraq izlədikdən sonra hər hansı transfer gerçəkləşsin”.