“Neftçi” transferə “55”dən başladı - FOTO

Lent.az-ın klubun rəsmi saytına istinadən verdiyi məlumata görə, flaqman serbiyalı qapıçı Saşa Stamenkoviçi heyətinə qatıb.

Rəsmi imzalanma mərasimi klubun bazasında “Neftçi”nin prezidenti Sadıq Sadıqovun iştirakı ilə baş tutub. Stamenkoviçlə “2+1 il” şərti ilə müqavilə imzalanıb. Tədbirdə çıxış edən Sadıqov 26 yaşlı qolkiperə uğurlar arzulayıb: “Məqsədimiz Azərbaycan futbolunun inkişafına töhfə verməkdir. Buna görə də “Neftçi”yə yalnız səviyyəli legionerlər cəlb etməyə çalışırıq. Saşa Stamenkoviç Serbiyanın ən güclü klublarından olan “Srvena Zvezda”nın şərəfini qoruyub. Onun Çempionlar Liqasında “Neftçi”nin uğurlu nəticə göstərməsinə kömək edəcəyinə və ümidlərimizi doğruldacağına inanırıq”.

Saşa Stamenkoviç isə “Neftçi”nin uğurları üçün çalışacağını bildirib: “Bilirəm ki, “Neftçi” Azərbaycanın ən köklü klubudur. Belə bir komandada oynamaq mənim üçün böyük şərəfdir. Var qüvvəmlə çalışıb, “Neftçi”nin Çempionlar Liqasında və Azərbaycan çempionatında uğur qazanmasına yardım edəcəyəm”.

Daha sonra Sadıq Sadıqov yeni transfer Saşa Stamenkoviçə 55 nömrəli formanı təqdim edib.