Binədə yeni idman zalı açıldı

Bakının Binə qəsəbəsində yeni idman zalı istifadəyə verilib. Gənclər və İdman Nazirliyinin mətbuat xidmətindən Lent.az-a verilən məlumata görə, tikintisinə 2007-ci ildən başlanılan və inşası üçün Bakı şəhər İcra Hakimiyyəti tərəfindən 0,36 hektar torpaq sahəsi ayrılan idman qurğusu “Bakı şəhərinin qəsəbələrinin sosial-iqtisadi inkişafının sürətləndirilməsinə dair tədbirlər Proqramı”na əsasən inşa edilib.

Baş plana əsasən inşa edilmiş Binə İdman Zalı iki mərtəbədən ibarətdir. Bina daxilində güləş zalı, məşqçi, həkim otağı, 2 ədəd soyunub geyinmə otağı, 2 ədəd duş kabinəsi, vestibül, texniki otaq, dəhliz, məşqçi otağı, müdiriyyət otağı, işçi otağı və həkim otağı, sanitar qovşaqlar var. Eyni zamanda idman qurğusunda 100 m3-lik içməli su anbarı, 100 m3-lik yanğın su anbarı, 100 kVa gücündə Komplekt transformator yarımstansiyası,
nasosxana binası, qazanxana binası, 1000 metrlik kanalizasiya təchizatı xətti, artezian quyusu, 72 metrlik elektrik təchizatı xətti, 980 metrlik qaz təchizatı xətti, 720 m2 asfalt yol örtüyü mövcuddur.