Berti Foqts: “Bir-iki mövqedə səhvimiz var”

Lent.az-ın məlumatına görə, jurnalistlərlə görüş iyunun 3-də yığmamızın Qazaxıstanla oynayacağı 2012-ci il Avropa çempionatının seçmə qrup matçına həsr olunub.

Foqts oyun öncəsi Bakıda keçirdikləri 12 günlük təlim-məşq toplantısından çox razı qaldığını bildirib: “Nadir hallarda futbolçularda belə əhval-ruhiyyə görmüşəm. Hazırlığımız 2 mərhələdən ibarət idi. Azərbaycan Kubokunun finalında oynayanlar toplanışa sonradan qatıldılar. Astanada süni örtüklü meydanda oynayacağımızdan, Bakıda belə qazonda məşq etdik”.

Baş məşqçinin fikrincə, Azərbaycanı Qazaxıstan yığması ilə çətin oyun gözləyir: “Gənc komanda olsaq da, buraya qələbə üçün gəlmişik. Komandamız özünə inanır. Əgər digər səfər oyunları ilə müqayisədə az səhv buraxsaq, Bakıya qələbə ilə qayıdacağımıza inanıram. Bir-iki mövqedə səhvimiz var və bu gün məşqdə onları həll edəcəyimizi düşünürəm”.

Qazaxıstana ilk dəfə gəldiyini deyən Foqts bu ölkədəki qonaqpərvərlikdən razı qaldığını vurğulayıb: “Bu, bizim üçün müsbət amildir”.