“Portu” Avropa Liqasının qalibi oldu

Futbol üzrə Avropa Liqasında 2010-2011-ci il mövsümünün qalibi müəyyənləşib. Lent.az-ın məlumatına görə, Portuqaliyanın “Portu” klubu tarixində 4-cü dəfə qitəmiqyaslı turnirin qalibi olub.

“Əjdahalar” Avroliqanın finalında ölkənin digər təmsilçisi “Braqa”nı məğlubiyyətə uğradıb – 1:0. İrlandiya paytaxtındakı “Dublin Arena”da keçirilmiş görüşdə yeganə topu 44-cü dəqiqədə Radamel Falkao vurub. Bununla da kolumbiyalı hücumçu Avroliqada qollarının sayını 18-ə çatdırıb və mövsümü bombardirlər siyahısında birinci pillədə başa vurub.

“Portu”nun baş məşqçisi Andre Villaş-Boaş isə Avropa kubokunu qazanan baş məşqçilər arasında ən gənc mütəxəssis kimi tarixə düşüb. Hazırda o, 33 yaş 213 günündədir. Əvvəlki rekord Canluka Vialliyə məxsus idi. Viallinin rəhbərliyi altında İngiltərənin “Çelsi” klubu 1998-ci ildə UEFA Kubokuna (indiki Avropa Liqası) yiyələnib. Həmin vaxt onun 33 yaş 308 günü olub.

Qeyd edək ki, əvvəllər “Portu” 1986-1987 və 2003-2004-cü il mövsümlərində Çempionlar Liqasının (Kubokunun), 2002-2003-cü il mövsümündə UEFA Kubokunun qalibi olub.