Nəqliyyat Nazirliyinin rəqibləri Vergilər və Ekologiya və Təbii Sərvətlər nazirlikləri olacaq

Milli Məclisinin təşəbbüsü ilə 11 may – 15 iyun 2011-ci il tarixlərində keçiriləcək Heydər Əliyevin xatirəsinə həsr edilmiş “Parlament kuboku – 2011” mini futbol turnirində Nəqliyyat Nazirliyinin komandasının da iştirakı nəzərdə tutulub. Lent.az-ın Nazirlər Kabinetinin rəsmi saytına istinadən verdiyi məlumata görə, turnirdə nazirliyi aparat işçiləri ilə yanaşı tabeli qurumlardan da müvafiq əməkdaşların cəlb olunduğu “İpək yolu” mini futbol komandası təmsil edəcək.

Hər birində 3 komanda olmaqla, 4 qrupda ümumilikdə 12 komandanın mübarizə aparacağı turnirin “C” qrupunda yarışacaq Nəqliyyat Nazirliyinin komandasının rəqibləri Vergilər Nazirliyi və Ekologiya və Təbii Sərvətlər Nazirliyi olacaq. Qrupda ilk iki yeri tutan komanda növbəti pley-off mərhələsinə vəsiqə qazanacaq. Komandanın ilk oyunu mayın 18 may-də Vergilər Nazirliyi ilə olacaq və Bakı Dövlət Universitetinin idman kompleksində keçiriləcək.