“Turan”ın sabiq baş məşqçisini əlbəyaxa döyüşə buraxmadılar

Lent.az-ın məlumatına görə, mübahisə GFF rəsmiləri ilə veteran futbolçu, Tovuzun “Turan” klubunun sabiq baş məşqçisi Revaz Dzodzuaşvili arasında yaranıb.

Dzodzuaşvili federasiya rəsmilərini fəaliyyətsizlikdə suçlayıb. Veteran futbolçunun sözlərinə görə, GFF problemin həlli naminə heç nə etmir. Onun ittihamlarına Gürcüstan yığmasının baş məşqçisi Temuri Ketsbaya cavab verib. Ketsbaya bildirib ki, vaxtilə məhz veteranlar və GFF-in keçmiş rəhbərliyinin fəaliyyətsizliyi üzündən Gürcüstan futbolu fəlakətli vəziyyətə düşüb. Tərəflər arasında konflikt yaranıb. Münaqişə yalnız digər tədbir iştirakçılarının müdaxiləsi nəticəsində davaya keçməyib.

Qeyd edək ki, GFF-in mətbuat konfransı bir neçə komandanın danışılmış oyunlara gedərək, totalizatorlardan uduş məqsədilə oyunların nəticələrini saxtalaşdırması ilə əlaqədar çağırılıb. Söhbət Roin Onuani, Levan Virtaqava (hər ikisi “Bayya”), Spartak Qoqiya, Kaxaber Kirtadze (hər ikisi “Samtrediya”) və Giqa Beçvayadan (“Vit-Corciya”) gedir. Oniani və Qoqiya öz komandalarının kapitanı olub. Danışılmış oyun qarşılığında futbolçulara hər oyuna 12-15 min dollar verilib. Onlar Gürcüstan Daxili İşlər Nazirliyində dindirildikdən sonra azadlığa buraxılıblar. Artıq adları hallanan oyunçular öz klublarından kənarlaşdırılıblar.