16 yaşlı idmançımız özündən böyüklərə qarşı

Mayın 7-də Almaniyanın Münhen şəhərində akademik avarçəkmə üzrə yeniyetmələr arasında ənənəvi “Internationale DRV-Junioren-Regatta” turniri start götürəcək. Lent.az-ın məlumatına görə, iki gün davam edəcək yarışda Azərbaycanı 5 oğlan, 1 qız avarçəkən təmsil edəcək.

Yeganə qız Alyona Kaporeyko 15-16 yaşlıların mübarizəsində 1 nəfərlik qayıqla yürüşlərdə çıxış edəcək. Oğlanlar isə 17-18 yaşlıların yarışında qüvvələrini sınayacaqlar. Onların arasında 16 yaşlı Boris Yotov da olacaq. Yotov 1 nəfərlik qayıqla özündən böyüklərə qarşı mübarizə aparacaq. Qardaşxan Hüseynli – Kamal Xanlarov dueti 2 nəfərlik qoşa avarlı, Novruz Əliyev – Bayram Əliyev dueti isə 2 nəfərlik sükansız qayıqla yürüş edəcəklər. Akademik avarçəkənlərimiz Almaniyada məşqçilər Samir Məmmədov və Yuliana Stoyevanın rəhbərliyi altında yarışacaqlar.

Qeyd edək ki, iki gün davam edəcək “Internationale DRV-Junioren-Regatta”da Almaniyanın 15 klubundan əlavə, Avstriya, Braziliya, Bolqarıstan, Xorvatiya, Çexiya, İspaniya, Fransa, Böyük Britaniya, İrlandiya, Hollandiya, Polşa, Sloveniya, Serbiya, İsveçrə də təmsil olunacaq.