Nazim Süleymanovu da Mirça Rednikə qoşdular

Süleymanov “İnter”lə NBC Bank Azərbaycan Kubokunun ilk yarımfinal qarşılaşmasının 85-ci dəqiqəsində texniki zona qaydalarına riayət etməyib. Meydançadan kənarlaşdırılan baş məşqçi 1 oyunluq cəzaya, klubu isə 1000 manat cəriməyə məruz qalıb. Onun cəzası ölkə kubokunda təkrar oyuna şamil ediləcək.

Petrov isə Unibank Premyer Liqasının XXIX turunda “Neftçi” ilə oyunun 87-ci dəqiqəsində baş hakim Rövşən Əhmədova qarşı kobudluq edib. O, hakimi yerə yıxdığı üçün birbaşa qırmızı vərəqə alıb. Petrova 2 oyunluq cəza, klubuna isə 2 min manat cərimə kəsilib. Diskvalifikasiya yalnız çempionat oyunlarına şamil ediləcək.

AZAL – “Neftçi” görüşündə qonaq komanda azarkeşləri metal arakəsmələri əyib-sındırıblar. Bu səbəbdən, “Neftçi” klubu dəymiş zərərə uyğun olaraq AZAL-ın təqdim edəcəyi hesab əsasında ödəmə etməlidir.

“Qəbələ” də 3 min manat ziyana düşüb. Bu məbləğin 2 min manatı Deon Bartonun “Simurq”la görüşdə kobud oyunla əlaqədar birbaşa qırmızı vərəqə almasından irəli gəlib. Bartonun özü 2 oyunluq cəzalandırılıb. “Qəbələ” daha min manat cəriməni həmin görüşdə 4 futbolçusunun sarı vərəqə alması üzündən ödəyəcək. Eyni səbəbdən, “Bakı” da min manat ziyana düşüb. Paytaxt klubunun 4 futbolçusu “Qarabağ”la görüşdə sarı vərəqə alıb.

Qeyd edək ki, Azərbaycan Kubokunun mayın 4-də keçiriləcək təkrar yarımfinal matçında “Xəzər Lənkəran”ın baş məşqçisi Mirça Rednik də “Bakı” ilə oyunu tribunadan izləməli olacaq. Rednik “Neftçi” ilə ¼ final mərhələsinin ilk görüşündə etdiyi hərəkətə görə 5 oyunluq cəzalandırılıb.