“Qarabağ” “Everton” və “Qalatasaray”dan öndə

Lent.az-ın məlumatına görə, 406 ən güclü klubun olduğu siyahıda Azərbaycan təmsilçilərindən yalnız “Qarabağ” yer alıb.

Ağdam komandası ötən ayla müqayisədə 9 pillə irəliləyib. Hazırda “Qarabağ” 82 xalla 209-cu yerdədir. Azərbaycan təmsilçisi Qətərin “Əl-Sədd” və Meksikanın “Real San Luis” klubları ilə eyni pilləni bölüşür. Əvəzində “Qarabağ” “Everton, “Qalatasaray”, “Bordo”nu 5 pillə qabaqlayır. Ağdam klubunun geridə qoyduqları arasında “Hoffenhaym” (Almaniya), “Maynts” (Almaniya), “Birmingem” (İngiltərə), “Atletik” (İspaniya), “Fulhem” (İngiltərə), “Bursaspor” (Türkiyə), “Fiorentina” (İtaliya) kimi komandalar da var.

Siyahıya isə artıq “İnter” (İtaliya) deyil, “Barselona” (İspaniya) başçılıq edir. 300 xala malik “Barsa” ən yaxın izləyicisi olan prinsipial rəqibi “Real Madrid”i 2 xal geridə qoyur. “İnter” isə 250 xalla 5-ci pilləyə enib. “Portu” (Portuqaliya) 278 xalla 3-cü, “Mançester Yunayted” (İngiltərə) isə 269 xalla 4-cü pilləyə yüksəlib.