“Neftçi” - çempion!

Futbol üzrə Unibank Premyer Liqasında çempion müəyyənləşib. Lent.az-ın məlumatına görə, “Neftçi” klubu çempionatın sonuna 3 tur qalmış qızıl medalları təmin edib.

Flaqman XXIX turda səfərdə AZAL-ı 3:1 hesabı ilə yenərək, ən yaxın izləyicisi "Xəzər Lənkəran"la xal fərqini 10-a çatdırıb. “Ağ-qaralar” 2005-ci ildən sonra ilk dəfə bu uğura nail olub. Ümumiyyətlə, flaqman 5-ci dəfə qızıl medal qazanıb. 2005 və 2011-ci illərdən əlavə, “ağ-qaralar” 1992, 1996 və 2004-cü illərdə də çempion olub. 1997-ci ildə də eyni uğuru qazanmasına baxmayaraq, AFFA-nın o zamankı rəhbərliyi qızıl medala “Qarabağ”ı layiq görüb. Amma UEFA məhz “Neftçi”nin Çempionlar Liqasında oynaması barədə qərar çıxarıb. Bu çempionluğu flaqmana Arif Əsədov qazandırıb. Əvvəllər futbolçu kimi “Neftçi”də qızıl medal qazanmış 41 yaşlı mütəxəssis indi baş məşqçi kimi tarixə düşüb.

XXIX turun nəticələrindən sonra Avropa kuboklarında ölkəmizi təmsil edəcək 4 klubdan 2-si müəyyənləşib. Çempionlar Liqasında mübarizə aparacaq “Neftçi”dən əlavə, “Xəzər Lənkəran” Avropa Liqasına vəsiqə qazanıb. Lənkəran klubu qalan 3 turda ən pis halda 3-cü pilləyə enə bilər ki, bu da baş məşqçi Mirça Rednikin mövsümü mükafatçılar sırasında bitirəcəyi deməkdir. Sonuncu dəfə “Xəzər Lənkəran” 2006-2007-ci il mövsümünü medalla başa vurub. Həmin vaxt “ağ-yaşıllar” çempion olublar.

1 may (bazar)
AZAL (Bakı) – “Neftçi” (Bakı) - 1:3
Qvidas Yuşka, 90 - Cavid Hüseynov, 15. Ritus Krjauklis, 17-öz qapısına. Rodriqinyo, 90 Qırmızı vərəqə: Robert Petrov, 86 (AZAL)

“Qarabağ” (Ağdam) – “Bakı” - 2:2
Georgi Adamiya, 60. Admir Teli, 89 - Zaur Həşimov, 22-öz qapısına. Vaqif Cavadov, 25

“Turan” (Tovuz) – “Muğan” (Salyan) - 0:1
Taqim Novruzov, 42

30 aprel (şənbə)
“İnter” (Bakı) – “Xəzər Lənkəran” - 1:1
Asif Məmmədov, 29 - Hristu Kiaku, 60

“Gəncə” – MOİK (Bakı) - 1:0
Sabir Allahquliyev, 63

“Simurq” (Zaqatala) – “Qəbələ” - 0:0

Turnir cədvəli

	Komanda	O	Q	H	M	Qollar	Xallar
1	Neftçi	29	19	8	2	52-13	65
2	Xəzər Lənkəran	29	15	10	4	34-16	55
3	Qarabağ	29	16	6	7	36-18	54
4	AZAL	29	12	9	8	32-25	45
5	İnter	29	12	8	9	28-24	44
6	Bakı	29	9	10	10	31-28	37
7	Qəbələ	29	11	11	7	28-17	44
8	Muğan	29	11	8	10	25-28	41
9	Gəncə	29	8	11	10	29-31	35
10	Turan	29	6	6	17	21-41	24
11	Simurq	29	3	7	19	15-46	16
12	MOİK	29	2	6	21	9-53	12