Avropa Liqası: “Portu”dan yenə 5 qol

Lent.az-ın məlumatına görə, Portuqaliyanın paytaxtı Lissabonda və Portu şəhərində keçirilmiş hər iki qarşılaşma meydan sahiblərinin qələbəsi ilə yekunlaşıb.

“Benfika” “Braqa” ilə matçda minimal üstünlüklə qalib gəlib. Əvəzində “Portu” İspaniya “Vilyarreal”ını darmadağın edib. Hesabı ilk yarıda qonaqlar açsalar da, fasilədən sonra meydan sahibləri 5 dəfə fərqləniblər. Qollardan 4-ünü Radamel Falkao vurub. Bununla da “Portu” bir həftə sonra İspaniyada keçiriləcək cavab görüşünü formallığa çevirib. Artıq indidən demək olar ki, mayın 18-də baş tutacaq final görüşündə böyük ehtimalla Portuqaliya komandaları üz-üzə gələcəklər.

Qeyd edək ki, “Portu” ¼ finalda Rusiya “Spartak”ının qapısından da hər iki görüşdə 5 top keçirmişdi – 5:1, 5:2.

“Benfika” (Portuqaliya) – “Braqa” (Portuqaliya) - 2:1
Nivaldo Vieyra Jardel, 50. Oskar Kardozo, 59 - Vandinyo, 53

“Porto” (Portuqaliya) – “Vilyarreal” (İspaniya) - 5:1
Radamel Falkao, 49-pen; 67; 75; 90. Freddi Quarin, 61 - Ruben Qratsia Kani, 45

Cavab görüşləri mayın 5-də keçiriləcək.