Milli komandanın hər futbolçusuna 80 litr pivə vəd olundu

Çexiyalı pivə istehsalçısı Stanislav Bernard 2010-cu il dünya çempionatının seçmə qrup matçında Sloveniya millisi üzərində qələbə qarşılığında Slovakiya yığmasının hər bir futbolçusuna 80 litr pivə vəd edib.

Lent.az-ın Çexiyanın “Sport” qəzetinə istinadən verdiyi məlumata görə, Slovakiya sakini il ərzində orta hesabla məhz bu qədər pivə içir.

Slovakiya – Sloveniya qarşılaşması oktyabrın 10-da keçiriləcək. Bernard qonşu ölkə yığmasının bu görüşü qələbə ilə başa vuracağına və Çexiyanın dünya çempionatının final mərhələsinə vəsiqə şanslarını yüksəldəcəyinə inandığını bildirib.

3-cü seçmə qrupda yer alan Slovakiya 8 turdan sonra 19 xalla 1-ci yerdə qərarlaşıb. İkinci pillədə gedən Sloveniyanın 14 xalı var. Çexiya isə 12 xalla Şimali İrlandiyadan sonra 4-cü yeri tutur. Birinci yerin sahibi kimi Cənubi Afrika Respublikasında keçiriləcək final mərhələsinə birbaşa vəsiqə qazanmaq üçün Slovakiyaya Polşa və Sloveniya ilə qarşıdakı oyunlarda cəmi 2 xal da kifayətdir. İkinci pillənin sahibi bu hüquqa yiyələnməkdən ötrü pley-off səddini də adlamalıdır. Qrupda qalan pillələrin sahibləri isə növbəti mərhələyə yüksəlmək şansını itirirlər.