FİFA Ukraynanı diskvalifikasiya ilə hədələdi

Lent.az-ın məlumatına görə, buna ölkə rəhbərliyinin FFU-nun işinə müdaxiləsi səbəb olub.

FİFA-nın açıqlamasında bildirilir ki, hökumət ötən ilin dekabrında federasiya prezidenti Griqori Surkisi istefaya göndərməyə cəhd edən İcraiyyə Komitəsinin bir neçə üzvünün tərəfini saxlayıb. Komitə üzvləri Qriqori Surkisi qardaşı İqor Surkisin prezidenti olduğu Kiyev “Dinamo”suna kömək etməkdə ittiham ediblər. FFU prezidenti postunu qoruyub, lakin onun rəqibləri federasiya rəhbərinin istefasına nail olacaqlarını bəyan ediblər.

FFU-ya göndərilən məktubda bildirilir ki, Surkisi istefaya göndərmək istəyən federasiya üzvlərinə hökumətin təzyiq etdiyi barədə FİFA-da sübutlar var. Məktubda hazırkı prezidentin səlahiyyət müddətinin bitəcəyi 2012-ci ilədək postunda qalmalı olduğu əksini tapır. FFU bu müddətdən tez rəhbərliyini dəyişsə, FİFA qəbul etməyəcək.

Diskvalifikasiya təqdirində Ukraynanın yığma və klub komandaları FİFA bayrağı altında keçirilən turnirlərə qatıla bilməyəcəklər. 2012-ci ildə Ukrayna Polşa ilə birgə təşkil edəcəyi Avropa çempionatında oynamalıdır.