“Qarabağ” Elvin Məmmədovu “Neftçi”yə təklif edib?

Bu haqda Lent.az-a klubun baş direktoru Əmrah Çəlikəl məlumat verib. Onun sözlərinə görə, “Qarabağ” rəhbərliyi cari mövsümün sonunadək müqaviləsi olan Məmmədovu gələcəkdə də komandada saxlamaq istəyib. Lakin 23 yaşlı yarımmüdafiəçi ilə anlaşmaq mümkün olmayıb. Çəlikəl səbəb açıqlamaqdan imtina edib: “Bu, klubun daxili işidir”.

Klub rəsmisi Məmmədovu hələ 5 ay “Qarabağ”da oynatmaq hüququna malik olduqlarını söyləsə də, başqa kluba keçidinin mümkünlüyünü inkar etməyib: “Elvinin başqa komandaya keçib-keçməyəcəyini zaman göstərəcək. Hansısa yenilik olsa, bunu hamı biləcək”.

İndiyədək tovuzlu futbolçunun “Bakı”ya keçmə ehtimalının daha yüksək olduğu bildirilirdi. Lakin bu gün Məmmədovun “Neftçi”yə təklif olunduğu barədə söz-söhbətlər yayılıb. Çəlikəl isə belə bir halın baş vermədiyini deyib.

Qeyd edək ki, “Qarabağ” qış transfer dövründə hələlik bir transfer reallaşdırıb. Bu, ötən mövsümü Türkiyə çempionatının I liqasındakı “Mersin İdman Yurdu”nda keçirən İlqar Qurbanovdur. Eyni zamanda son iki gün ərzində 2 legioner baxışa cəlb olunub. 25 yaşlı bosniyalı hücumçu Zoran Kokotla 27 yaşlı makedoniyalı hücumameylli yarımmüdafiəçi Nderim Nedzipi haqda yaxın günlərdə qərar veriləcək.