“Lokomotiv” Avropa Çağırış Kubokunun 1/8 mərhələsində - FOTO

Qadınlar arasında 2010-2011-ci illər Avropa Çağırış Kubokunun (“Çelenc Cup”) növbəti mərhələsində Azərbaycanın “Lokomotiv” və Avstriyanın “Lints” komandalarının 1/16 final mərhələsində cavab görüşü keçirilib. “Azərbaycan Dəmir Yolları” Qapalı Səhmdar Cəmiyyətinin (QSC) mətbuat katibliyinin rəisi Nadir Əzməmmədov Lent.az-a bildirib ki, “Sərhədçi” İdman Mərkəzində baş tutan oyun bütünlüklə “Lokomotiv”in aşkar üstünlüyü şəraitində keçib.

Oyunun hər iki hissəsində “Lokomotiv”çilərdən Yelena Parxomenko, Kseniya Kovalenko, Oksana Məmmədyarova, Devis Nikol, Aleksandra Samoylova, Kremena Kamenova, Smak Monika, Yelena Keldebekova, Vera Klimoviç, Metcalf Nansy, Mariya Filipova, Kristin Riçhardsın oyunu tamaşaçıların alqışları ilə müşayiət olunub.

Gərgin mübarizə şəraitində keçən oyunda “Lokomotiv” Avstriyanın “Lints” komandasına 3:0 hesabı ilə qalib gəlib. Bununla da “Lokomotiv” növbəti mərhələyə vəsiqə qazanıb. Avropa Çağırış Kubokunun (“Çelenc Cup”) 1/8 final mərhələsində “Lokomotiv”in rəqibi Kiprin “Apollon Limassol” komandası olacaq.

Xatırladaq ki, 1/16 final mərhələsində “Lokomotiv” – “Lints” qarşılaşmasının ilk görüşü 4 yanvar 2010-cu ildə Avstriyanın Lints şəhərində keçirilmişdi. Həmin görüşdə də komandamız 3:0 hesablı qələbə qazanmışdı.

“Lokomotiv” komandanın baş məşqçisi Draqutin Baltiçdir.

Elxan SALAHOV