“Neftçi” yeni məşqçini bəyəndi

Lent..az-ın məlumatına görə, bu haqda flaqmanın vitse-prezidenti Tahir Süleymanov klubun rəsmi saytına açıqlamasında bildirib.
Süleymanovun fikrincə, türkiyəli mütəxəssisin işi baş məşqçi Arif Əsədovu qane edir: “Artıq iki gündür ki, türkiyəli mütəxəssis komandamızın düşərgəsindədir və məşqlərdə də yaxından iştirak edir. Mehmet Akın işi baş məşqçi Arif Əsədovu da qane edir. Fikrimcə, “Neftçi”nin gələcək uğurlarında Mehmet Akın əməyi olacaq. Onunla müzakirələr aparmışıq və yaxın günlərdə müqavilə imzalanacaq".
Klub rəsmisi "Neftçi"nin Türkiyənin Antalya şəhərində davam edən təlim-məşq toplantısı barədə də danışıb. Onun sözlərinə görə, prezident Sadıq Sadıqovun tapşırığı ilə flaqmanın Antalyada yüksək səviyyədə hazırlıq keçməsi üçün hər cür şərait yaradılıb: "Toplanış iki mərhələdən ibarət olacaq. İlk mərhələdə əsasən fiziki hazırlıq proseslərinə diqqət yetiriləcək və 1 yoxlama görüşü keçirəcəyik. Yanvarın 19-da Rusiyanın "Rubin" klubu ilə yoldaşlıq görüşü keçirməyi planlaşdırmışıq. Yanvarın 24-dən Antalyada davam edəcək ikinci hazırlıq prosesində 4 görüşün keçirilməsini nəzərdə tutmuşuq. Əsas məqsədimiz çempionatın qalan hissəsinə yüksək səviyyədə hazırlaşaraq, bu mövsüm “Neftçi”sevərlərə çempionluq sevinci yaşatmaqdır”.