Bülənt Korkmaz “Neftçi”dən danışdı

Lent.az-ın məlumatına görə, Korkmaz flaqmanın rəsmi saytına açıqlamasında “ağ-qaralar”ın oyunlarını televiziya vasitəsilə izlədiyini bildirib. Onun fikrincə, “Neftçi” bütün komponentlərdə çox xoş təsir bağışlayır, komandanın lider olması isə kollektivdə işlərin düzgün qurulmasını göstərir: “Mən Azərbaycanda çalışdığım müddətdə “Neftçi”nin orada ən çox sevilən komanda olduğunu gördüm. Keçən mövsümdəki “Neftçi”nin demək olar ki, bütünlüklə yenilənməsi müsbət effekt verib. Klub rəhbərliyinin və məşqçilər korpusunun işini xüsusi vurğulamaq lazımdır. Komandanın heyətinin 50 faizdən çoxunun dəyişdirilməsi böyük bir riskdir. Ancaq görünür ki, yeni “Neftçi” buna hazır imiş”.

Flaqmanın istədiyi kollektivi formalaşdırdığını deyən Korkmazın sözlərinə görə, Emil Mpenza səviyyəsində futbolçunun transferi klub rəhbərliyinin çempionluğu necə istədiyinin göstəricisidir: “Bu addımı ancaq alqışlamaq lazımdır. İnanıram ki, “Neftçi” kimi zəngin tarixə malik komanda Avropa kuboklarında öz sözünü deyəcək”.